KAPIN sa P1 million nga balor sa drugas nga gitaguan sa kanal nasakmit sa kapulisan kagahapon sa alas 10 sa buntag sa Sitio Pulpogan 1, Brgy. Pulpogan, lungsod sa Consolacion, Sugbo.
Si Cris Mata Ortega, 35, dunay kapuyo, taga Cambiyuhan, Danao City, nagpuyo sa Pulpogan 1, nasikop uban sa iyang kapuyo nga si Jenny Montesioso Jaime, 32.
Lakip sa nasikop ang ilang bata-bata nga si Geran Dela Victoria Ligan, 29, ulitawo, taga San Roque, dakbayan sa Talisay.
Si Ortega ang niangkong nanag-iya sa drugas nga napalgan sa kapulisan.
Si Chief Inspector Gerald Ace Pelare, hepe sa Consolacion Police nga nahinabi sa Superbalita Cebu, nagkanayon nga nasikop nila ang tulo niadtong Huwebes sa alas 9:30 sa gabii sa buy bust operation sa lugar.
Nakuhaan kini nila og lima ka gagmay nga putos sa shabu.
Apan kagahapon sa buntag, nitug-an si Ortega sa kapulisan nga ang daghang shabu nga iyang dala atol sa dakop sa miaging gabii gitagoan niya sa kanal.
Sa ilang pag-abot sa lugar, gisaksikan ni barangay konsehal Geroncio Azucenas ug sa media, nakuhar ang drugas sa kanal nga gisulod og kolor blue nga gamay nga sudlanan.
Gisulod sab sa dark blue nga paper bag ang upat ka dagkong bulto sa shabu nga nitimbang og 100 gramos nga mobalor og P1.1 milyunes.
Si Pelare niingon nga si Ortega ug iyang kapuyo nga si Jaime, dul-an usa ka bulan pa lang nga nag-abang sa Pulpogan, Consolacion.
Nitug-an nila si Ortega nga ang shabu ilang i-supply sa dakbayan sa Danao, Compostela, Liloan, Consolacion ug mga silingang lugar.
Si Pelare nibutyag nga base sa pamahayag ni Ortega, nagsilbi lang siyang middle man sa transaction sa drugas.
Dunay mo-text kaniya nga giingong amo niini nga ipakuha ang ilang supply sa drugas diin suholan siya niini.
Gisubay pa nila ang koneksyon ni Ortega, sa ubang drug personalities sanglit usa kini ka bigtime drug pusher.
Matag simana maka-dispose si Ortega og 100 gramos.
Si Pelare niingon nga ang pagkasikop ni Ortega ug kaubanan kabahin sa ilang programa nga Oplan Limpiyo Consolacion.
Samtang kanhi sales associate sa usa ka mall dinhi sa dakbayan sa Sugbo nakuhaag binultong shabu dihang nadakpan sa buy bust operation sa mga sakop sa Philippine Drug Enforcement Agency (PDEA) 7 niadtong Huwebes sa hapon sa may dalan B. Rodriguez, Barangay Sambag 2, dakbayan sa Sugbo.
Wa na siya makasaulog sa iyang birthday kay nasikop na siya.
Si Ryan Tundag, 31, minyo, lumad nga taga Barangay Tulic, Argao, nakuhaag tulo ka dagkong putos nga bulto, unom ka gagmay nga putos, lakip ang subject sa buy bust ug P200 nga buy bust money.
Si Tundag nga nahinabi sa Superbalita Cebu niingon nga human nasunog ang mall nga iyang gitrabahoan, napugos siyag balik sa pag-sideline sa pagpamaligya og shabu.
Kon dunay mo order, suhulan siyag P100. Nangyawat siya nga makatigom kay birthday niya kagahapon, apan wa na madayon ang iyang hikay.