HELLO, mga higala! Kumusta dinha?
Niadtong milabay'ng Miyerkules, petsa 7 sa Marso ning kasamtangang tuig, nakaabot sa siyudad sa Dabaw ang biyahe sa programang, "Passport on Wheels" kun "POW" sa Department of Foreign Affairs (DFA).
Gilusad ang maong programa agi'g tubag sa panginahanglan sa publiko alang sa dugang ug epektibong pagproseso sa pasaporte. Nganong naay "wheels?" Ay, kay literal nga sakyanan (van) man god ang gamiton sa maong kalihukan, igsuon.
Sa wala nasayud, ang pasaporte mao ang dokumento nga kuhaon nato sa DFA aron makabiyahe kita gawas sa nasud Pinas. Klaro? Siyempre, kinahanglan duna kitay pasaporte (nga dili peke) aron dili ta balibaran sa nasud nga atong trabahoan o suruyan.
Matud pa ni DFA secretary, Alan Peter Cayetano, 600,000 ka mga aplikante ang nadungag niadtong 2017, hinungdang lisud makakuha'g pasaporte nga pinaabtik kay duna pa silay mga backlog o nabiling trabahuonon tungod pod sa ilang limitasyon.
Ang pamaagi sa pagkuha'g pasaporte kaniadto mao ang paglinya sa buhatan sa DFA ug sa ubang gipiling lugar aron ma-eskedyulan ang pag-interbyu sa aplikante. Nahimong high tech gamay ang proseso kay diretso na sa internet magkuha'g appointment o schedule, migo APAN paspas pod kaayong napuno ang mga "slots." Sa sunod Hunyo pa kuno kini magamit utro hu hu!
Gisulayan sa DFA ang ka-epektibo sa POW nga programa ngadto sa kaulohan sa tibuok bulang Enero. Epektibo seguro kay nakaabot na ang programa sa nagkadaiyang dapit sa nasud nato.
Ang maong kalihukan inabagan sa lokal nga panggamhanan diin upat ka libo ang ihap sa mga aplikante nga nakakuha'g appointment for interview sa Marso 16 ug 17 didto sa Almendras Gym, siyudad sa Dabaw.
Nganong nagsuwat ko niini? Awwww, usa ko sa kapin 2 kalibo nga naglinya atong petsa 7, miga. Intawon ang uban, alas dos pa sa kaadlawon niadto aron lang mauna sa linya, migo. Tungod alas 7 na nakaabot kining inyong amiga, ika-225 ang numero nako sa linya.
Maayo na lang kadaghanan sa mga katawhan, gipili ang pagsabot, pagpaubos ug pagtabang sa uban agi'g likay sa kasamok sa kalibutan ha ha!
Bitaw, nahuman ko hapit alas dos na sa hapon. Dako kaayo akong pasalamat sa kusog ug pabor sa Ginoo nga nakalahutay ko sa maong proseso. Daghan god ang gisapot, napasmo ug nagpangalot sa ulo bisan walay katol kay duna man poy ubang katawhan nga dili motultol sa tarong ug bintahuso, igsuon. Kana god mosuksok sa linya bisan daghan na ang nauna kaniya. Naa pod mga tawo nga lisud pasabton mao yawyawan kaayo. Haaaaaaaay naku!
Maayo na lang nga abtik ang mga personahe sa City Administrator's Office. Bisan nagkahasul-hasol sa sinugdanan, ila dayon gibuhatan og mga pamaagi nga nahimong komportable ang mga aplikante. Gikan sa init nga paglinya sa gawas sa City Hall, gihatud mi sa bus padulong sa Almendras Gym aron makapabugnaw sa ulo kay air-conditioned man didto.
Sa katapusan, mobalik ang mga taga-DFA ug mga aplikante sa petsa 16 ug 17. Duna pay gamay'ng higayon nga makalaag anang adlawa, igsuon, kay atol kini sa Araw ng Dabaw celebration.
Hinaut tutukan og tarong sa DFA ang maong proseso aron happy ang tanang aplikante, migo.