NAGTUO ang awtoridad nga duna pa'y mga bodega sa mini nga mga sigarilyo sa Davao City, butang nga ila pa kining gipanid-an aron rondahon.
Kini human giandam sa National Bureau of Investigation (NBI) Davao ang pagpasaka og kaso batok sa negusyante nga ilang nakuhaan og mokabat P2 milyones nga kantidad sa peke nga sigarilyo niadtong Miyerkules.
Kasong pagsupak sa Republic Act No. 8293 kun Intellectual Property Code of the Philippines ang ipasaka nga kaso batok sa usa ka negusyante human nakumpiska sud sa ilang balay ang mokabat 38 ka mga karton sa peke nga sigarilyo.
Sumala sa impormasyon gikan sa NBI-Davao nga mipatuman sila og search warrant Miyerkules sa buntag sa usa ka balay sa Barangay 23-C, Poblacion District, Davao City.
Misugat sa NBI ang nagtapun-og nga 38 ka karton sa peke nga sigarilyo nga mokantidad og P2 milyones.
Giangkon sa dinakpang negusyante, kinsa mibalibad nga magpaila sa kaugalingon, nga peke gayud ang ilang produkto.
Sumala sa dinakpan nga gikan pa sa iyang higala nga negusyante nga taga Manila ang nasampit nga mga peke nga sigarilyo sakay sa barko.
Dihang gitawgan sa Superbalita ang Bureau of Customs Port of Davao, giingon sa opisyal nga naghangyo nga di lang isuwat ang pangalan tungod wa siya'y otoridad gikan sa ilang labaw dihang gihinabi sa telepono, nga istratehiya sa mga smugglers ang pagpalusot sa pekeng sigarilyo
pinaagi sa domestic nga biyahe
sa barko.
Gipasabot niya nga kung gikan sa laing nasud ang sigarilyo, sa Manila pa ikarga sa barko padung dinhi sa siyudad, mao nga di na moagi sa customs.
Gawas niini, suma niya, ipalusot sab ang peke nga sigarilyo sakay sa wing van nga mobiyahe gikan sa Manila paingon sa Davao.
Giingon sa opisyal nga higpit kaayo ang ilang buhatan karon sa pagpaniid sa inismagol nga produkto.
Ang mga nakumpiska nga ebidensya nakatakdang dalhon sa crime lab aron masubay kung tinuod ba nga peke ang maong produkto.