100 ka mga kawani sa ospital gipaundang

ANG wala pa maaprobahi nga budget alang sa 2018 ang gibasol ni Toledo City acting Mayor Antonio Yapha nganong gipaundang sa trabaho ang kapin sa 100 ka job-order nga mga empleyado sa Toledo City Hospital diin gii­ngong wala na ikasweldo ang kagamhanan sa siyudad.

Apan si acting Vice Mayor Joie Perales nipasabot nga ubos pa sa evaluation ug review ang budget nga naa karon sa committee on appropriations sa kon­seho nga gipa­ngulohan ni Merly Abad.

Sa 100 ka mga kawani, 6 niini mga doktor, 52 ang mga nars, ug may mga medical techno­logist, midwives ug ubang mga position nga gikinahanglan sa city hospital.

“Duha na ka buwan nga wala sila masweldoi unya luoy kaayo sige sila og trabaho unya way sweldo,” ingon ni Yapha dihang nahinabi sa Superbalita Cebu kagahapon.

Matod sa acting mayor, P1.2 bilyones ang iyang giduso nga budget sa konseho alang sa 2018 niadtong Oktubre sa mia­ging tuig, diin P2 milyones niini alang sa sweldo sa mga j.o.

Mas dako ang 2018 budget nga iyang giduso kon itandi sa P800 milyones sa 2017.

Siya nidugang niadtong Enero dapat ang 2018 budget na unta ang ilang gigamit, dili usab ma-reenact ang budget kay wala pay aksyon gihimo ang konseho.

“Kon naa may item nga wala nila magustohi, ilang ibalik, dili kay ang tibuok budget ilang i-hostage. Kay ang tag-iya ana ang katawhan man, kwarta man na sa katawhan,” dugang ni Yapha.

Sa memorandum sa acting mayor alang kang Dr. Bonito Zanoria, chief of hospital sa TCH, kini gimandoan nga i-operate ang ospital ubos sa kasamtangan nga status o classification niini isip usa ka infirmary nga 12 bed ang capacity.

Sa kamandoan pinet­sahan og Marso 5, 2018, kinahanglan nga dili molapas ang mga gastohanan ubos sa Person­nel Services ug Maintenance and Other Operating Expen­ses, gawas sa giaprobahan na.

Si Jum Kenneth Evangelista Alcover, ang nag-post sa iyang Facebook account bahin sa 100 ka mga empleyado nga gipaundang og trabaho, niasoy nga duha ka shifting ang iyang gi-duty niadtong Biyernes, sugod alas 7 sa buntag hangtod alas 3 sa hapon ug gipabalik siya pagka alas 11 sa gabii hangtod alas 7 sa buntag.

Lima na lang ka mga doktor apil ang chief of hospital ug 6 ka nurses ang nahabilin.

“Para nako, nakita nako ang emergency crisis kini kon dili pa sila molihok, ambot nalang daghan guro mamatay sulod sa hospital,” padayag ni Alcover.

Si Perales namahayag nga ilang ipatawag sa konseho ugma si Zanoria ug Dr. Arlene Perez, ang duha ka mga doktor nga nagdumala sa city hospital, aron mangayo og katin-awan.

Sumala sa acting vice mayor base sa pamahayag ni Zanor­ia, kinsa gidestino isip city health officer, ang tambalanan kay usa lang ka infirmary ug 12 ka higdaaanan ang kapasidad.

Apan si Perez giingong daghan og giablihan nga mga position alang sa TCH base sa gi-request nga pundo niini.

“It’s so unfair on our part nga kami ang gi-blame. Wala man mi moingon nga pangundang namo og trabaho dinha,” padayag ni Perales.

Siya nikwestyon nganong sila ang gibasol sa mayor sa nahitabo sa mga j.o.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph