Luzano: Atras-Abante...Uso ditoy Pinas!

No intay ibukirad dagiti matatayo iti agdama…maulawka pards iti kagabsuon dagiti agkakawil a paspasamak a nangibunga kadagiti kontrobersiya. Dagita a paset ti kagimongan ti ramot ken puon ti diskusyon ken dinniskutiran a kulkulaidagan met ti binnagkatan iti bukod a bangko.

In short…innepalan. Tay ngay takder nga isuda laeng ti napudno ken nadalus nupay iti likud…nakarkaroda pay ngem iti basura idiay Boracay ken kinangisit ti danum-Pasig! Pwe! Makapasakit-bituka ti kasta a kababalin dagiti dadduma a kailiantayo.

Ti bangsitna, kaasi piman dagiti pudno a nalinteg. Ti mas nabangbangsit pay…dagiti marigrigat ti maikuskuspil iti likud ti rusngiit dagiti buwaya kada limatek. Ala, sige..tulongandakami a manganalisar kadagitoy a riribuk ti biag:

-o0o-
Parikut: UGALI NGA ATRAS-ABANTE!...Ti anglemna, pards…kasla ad-adun sa met ti ATRAS ngem tay askaw nga pa-ABANTE.

Padasentayo man ti lumagip manipud kadagiti naglumen a siglo: Idi panawen ti Kastila…nailanad iti pakasaritaan ti pagilian no kasano a nagtitepkel ti puwersa dagiti kadaraantayo (bannuar ti pagilian) a rimmupir kadagiti nadangkok a Kastila.

Dita a naipakita ti bilegda nupay arigda laeng ti alutiit maikumpara iti kasla buwaya a kabusor. Dida nagsanud. Ngem iti pannagna ti panawen…ti nairusatda a puwersa-ABANTE wenno DARUP…ket nain-inut a nagbalin nga ATRAS. Ngamin…mismo nga iti uneg ti binukelda a sammaked (KKK ken dadduma pay a grupo) adda naigamer a sairo a gartem.

Dita a namantsaan ti nalinis a pondo ti grupo. Isu-isuda met laeng ti nagbanag nga agkakabusor a nangitonda iti in-inut nga ilalamiis ti bara ti inlablabanda a puwersa.

Ditayon aginagan pay kadagiti appotayo a bannuar ta nakababain laeng iti agdama a puli…no di ketdi ti adal nga imbatina ket tema ti ABANTE KEN ATRAS!
-o0o-
Idi panawen daydi Pres. Ferdie Marcos…adu a paset ti takemna ti nalawag a nagrairaran ti Atras-Abante nga eksena. Unaentayo laengen idi naikarsel ni Ka Ferdie gapu iti nadagsen kano a nagbasolan.

Iti uneg ti selda, saan nga IMMATRAS iti panangipursigina nga agadal iti abogasya ket nagballigi. Daytan ti punganay dagiti addangna a di pulos namki kadagiti adu a pannubok ti biagna nangruna idi timmapogen daytoy iti serbisyo publiko.

Idi addan daytoy iti kangatuan nga akmen iti kagimong, kimmaro dagiti basnot kontra kenkuana..ngem saan nga immatras. Pasig nga ABANTE agingga idi ideklarana ti 1081 wenno Martial Law a nangpalamiis iti dagaang ti kagimongan iti dayta a panawen (1972).

Ditan a gimminad a nangin-inut dagiti reporma ta nagameran kadagiti maka-PAATRAS nga aramid (kano) dagiti met laeng pasurot ken bileg iti sibayna. Iti ababa a pannao…gapu iti aramid dagiti sumagmamano a tao a naglablabes kadagita a tiempo…IMMATRAS ti talek ti kaadduan.

IMMABANTE ti rasok ni rurod ken ikkis dagiti nakarikna iti pannakailupit-lupit kontra iti diktadorya a nagtungpal iti IYA-ATRAS ni Makoy manipud Malakanyang. Ti adal dita: saan nga amin a panawen ket kabukbukodam.

Adda ungto ti tunggal Abante…no saan a DITAM…mabalinto nga ATRAS WENNO panagsanud!
-o0o-
Sakbay nga umakartayo kadagiti Atras-Abante a makabaruanan ita a panawenen dagiti Millinials (now-generations kano)…intay man lagipen ti panawen daydi Lolok a miyembro met ti… Millinials?
Saan..miembro ti Me-Linya na ang mukha…electric plates iti high-tech a siglo. Kanayon ngamin a yarasaas idi ni Lolok kenni Tatangko: anak, tandaanam: adda biag iti Atras-Abante.

No sinerkam, ammom ti ruruam. Kaimasan tay addang nga abante-atras nangruna no serkam ket dipay usado. Tay ngay tunggal abantem ket mariknam ti palagapag kasta met laeng iti eksenam nga atras.

Ti kayatna a sawen…no dika laokan iti linuloko nga aramid ti nadalus nga inyabantem a programa para iti kaadduan…agballigika. Ngem no ginameram iti binubuwaya ken linilimatek nga aramid a pakaidadanesan dagiti umili…agbanag nga ATRASTO amin ti apitem manipud kagimongan.

He he…sabalinto met ti turong ti kua ket…sori apo ta asideg gayamen ti Holy Week. Narigat ti mailansa iti utang, este idiay Kalbaryo.
-o0o-
Idi panawen ni Ex-Pres. Noynoy Aquino…IMMABANTE ti programa de bakuna con Dengvaxia kontra lamok-de-dengue

Kunada…kasla saan sa kano a nainpanawenan ta umadanin ti eleksiyon. Ala, bay-antayton dagita a lugitda tangay manarimaanen ti imbestigasyon dita. Aduda nga opisyales idi a maitudtudo nga addaan lamma iti anomaly a nakatayan ti adun a biktima. Napartak ti ABANTE ti programada iti dayta a panawen.

No mano nga ahensiya ti gobyerno ti tudo-Abante tapno matulongan kano dagiti umili kontra Dengue. Ngem kellaat a napa-atras ti programa idi maibutaktak a kasla pimmalpak kalpasan a limtuad dagiti duptal dagiti nagduduma met nga ahensiya a nagsukimat iti gapu a nakatayan ti adu a biktima. Iti agdama…saan nga immatras ti Gobyerno-Duterte babaen iti DOH.

Napaisubli babaen iti Sanofi (akinpartuat ti Dengvaxia) ti kantedad para kadagiti dipay naaramat a bakuna ken mayar-arungaing ti pannakaisubli pay ti gatad dagiti naaramaten.

In short, pards…tay INYABANTEDA a programa…nagbalin nga ATRAS! Sapay koma ta dida umatras a sapulen ti umno a hustisya dita.No sinno koma dagiti maduptalan a nagbasol…mapatawan iti nadagsen a dusa.
-o0o-
Idi panawen ni sigud a Presidente Obama ti US…grabe ti tension nangruna no rukodentayo ti nagbusi a dila ni Pres. Digong.

Adu nga isyu ti nagburek iti baet idi ti Pinas ken US ken dadduma pay a pagpagilian. Dayta idi….saan nga immatras dagiti tabbaaw kada kugtar ni Digong kontra Amerika. Idi nagpukaw ni Black a sinublat ni White (Donald)…in-inut a tay ABANTE-Marino ni Digong ket pimmino nga ATRAS-manok.

No apay nga Atras-Manok…kasla pagit-itlogen laeng daytoy ni Apo Duterte tapno inton agpessa sabalinto manen a potahe ti ipalamutna iti US nangruna iti isyu ti EJK gapu iti Oplan Tokhang kontra droga. Maysa nga ehemplo iti IMMATRAS a bara ti ABANTE kontra Amerika ket ti kaadda iti agdama ti PANGGUBAT A BARKO ti Estados Unidos dita Subic para kano iti Routine Patrolda.
Awan pay negatibo a basnot a nasiriptayo manipud gobyerno. Nupay idandanagantayo nga umadu manen dagiti SUMIRSIRIP a libnus kadagiti Puraw a mabalin a mamasahe.

He he…natural no adda ti kasta nga eksena, kunada..amangan ta umadu manen ti papulasyon dagiti Ameriseans. Joke lang.
-o0o-
Adu pay iti agdama a panawen dagiti ABANTE-isyu kas koma gannuat a pannakaikkat ni CJ Sereno. Awanto ngatan ti ATRASNA dayta?

Ti Abante nga addang ti gobyerno iti planoda a mangiserra iti Boracay gapu ta narugiten kano. Dinto ngata AGATRAS dayta a plano uray adu dagiti tumubtubngar?

Ti Barangay eleksiyon, masapul kano nga UMABANTE, kuna ti Palasyo. Kuna met dagiti sutil: amangan kano ta UMATRAS MANEN ta namin-anon nga IMMATRAS.

Hayy awanen ti oras, pards…nupay adu pay koma dagiti Atras-Abante nga isyu. Sanabale ta kuna ngarud ni lolok: basta adda atras-abante, adda biag. Adios mi amor, ciao, mabalos!
style="display:block; text-align:center;"
data-ad-layout="in-article"
data-ad-format="fluid"
data-ad-client="ca-pub-2836569479021745"
data-ad-slot="1977900730">



style="display:block; text-align:center;"
data-ad-layout="in-article"
data-ad-format="fluid"
data-ad-client="ca-pub-2836569479021745"
data-ad-slot="4158864647">


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph