KON nagsigi kag sunod sa Maghisgot Kitag Politika Bay sa Facebook, makakita ka sa bag-ong hulagway sa mga sakop sa Team Rama pinangulohan ni Vice Mayor Edgar Labella nga nakakuha na sa ilang Basic Membership Seminar sa PDP-Laban.
Ah, clarification diay, way labot sa nakakuhag BMS silang kanhi mayor Mike Rama, Konsehal Joy Pesquera, ug Konsehal Jun Alcover.
Nagkanayon ang usa nato ka higala nga sunod niini mao ang pag-ilis sa rehiyonal nga liderato. Di ba kaha si LTFRB Region 6 Director Ritchie Osmena, no?
Kon ingon niini ang direksyon sa PDP-Laban dinhi sa rehiyon, unsa may dangatan sa mga orihinal ug ang ilang nahatagan og mga BMS?
Mosugot kaha sila nga ipadaplin na lang?
Dayon, mosugot ba kaha si kanhi mayor Rama nga mohatag og kahigayonan ni Labella nga maoy modagan sa pagka mayor?
Akong pangagpas nga plano sa grupo ni Labella nga si Konsehal Edu Rama ang palansaron sa pagka bise mayor samtang kumbinsihon si Mike nga magkongresista.
Ambot lang kon mosalir ba kining paagi nga ipugos gikan sa ibabaw ug ang nagduso di gani sakop sa partido. Mao na tingale kini ang kausaban nga gipaabot.
Ang di kumbinsido, dunay nitumaw nga bag-ong grupo sa Davao nga gipangulohan ni Inday Sara Duterte, ang mayor sa Syudad sa Davao.
Trapik
Wa mag-usik sa panahon si Vice Mayor Labella. Human nakakuha na gyud sa BMS, nibanat dayon kini kang Mayor Tomas Osmeña tungod sa grabing trapiko nga resulta sa underpass project diha sa Mambaling.
Bisan pa man, manghinaot ko nga di kini mahimong rason nga babagan sa ilang grupo ang mga solusyon alang sa pagpalu-ag sa trapiko sama sa pagtugot nga makaagi sa SRP ang mga PUJ nga gikan sa Syudad sa Talisay.
Bisan unsaon pa natog himaraot kining underpass project, di na mahimong mobalik pa sa naandan. Kinahanglang tiwason kini.
Alang kanako, duha lang ka butang ang positibong mabuhat karon. Ipadali ang pagtiwas sa maong proyekto ug ang pagpahapsay sa trapiko sa mga side streets.
Sayo pa kaayo ang paghimo niini isip usa ka isyu sa eleksyon sa 2019.
Library
Samtang na-busy ang oposisyon sa pamulitika, dunay gibuhat si Mayor Osmeña nga dalaygon kaayo ug mao kini ang pag-abli sa Cebu City library diha sa Rizal museum building diha sa Capitol Site 24 oras kada adlaw. Gihimo niya kining 24/7.
Nisuroy ko sa library sa miaging Sabado ug ako mismong nakita nga napuno kini sa mga tinun-an nga nagtuon ug nagbasa og libro. Congratulations, mayor.
(@anol_cebu sa Twitter)