MAHAL ang mga libro nga kinahanglanon sa mga klase ni Mitch Roldan, maong matag adlaw makita nimo siya sa library sa ilang eskwelahan.
Si Mitch, 20, 4th year electronics engineering student sa Cebu of Institute of Technology-University, maoy nihangyo ni Cebu City Mayor Tomas Osmeña pinaagi sa iyang comment sa opisyal nga Facebook page sa mayor nga ikonsiderar ang pagbukas og public library nga abli 24 oras.
Ang iyang hangyo maoy naghimo sa siyudad sa Sugbo nga labing unang lugar sa nasod nga dunay public library nga abli 24 oras matag adlaw.
Wa siya magdahom nga ang hangyo dunggon ug tumanon sa labing taas nga opisyal sa kagamhanan sa siyudad sa Sugbo.
“Giingnan gud ko sa akong mama bagaa nimo og nawong, pansinon gyud kaha ka nga sa kadaghan niya (Osmeña) og trabaho,” saysay ni Roldan sa Superbalita Cebu human pahibaw-a ang iyang inahan nga si Mergy nga nahimuot sa iyang komento sa Facebook page sa mayor.
Sa 9 ka mga libro nga gamiton sa lainlaing subjects ni Roldan, tulo ra ang napalit niini nga pulos second hand nga iyang nakit-an sa books sale.
Matod niya, tag P2,000 ang labing barato nga libro sa ilang kurso. Samtang, ang uban kay wala gibaligya dinhi sa Pilipinas.
Kini ang hinungdan nga di mominos tulo ka oras matag adlaw ang iyang igahin sa library sa ilang tunghaan aron magtuon ug mag-research sa mga libro nga magamit sa ilang mga klase.
Kon wa siya’y klase sa buntag, magtuon siya og tulo ka oras ug laing mga oras usab sa hapon.
Sa Sabado, moadto usab siya sa library sa eskwelahan nga bukas gikan alas 8 sa buntag hangtod sa alas 12 sa udto, aron magtuon usab.
“No background sa engineering sa among family, so sige kog adto sa library kay daghan og books. Dili ko ka-afford sa books namo kay mahal,” sumala ni Roldan.
Tungod sa iyang pagkasuki sa library, siya nahimo nga top borrower sa ilang eskwelahan kaduha ka higayon, niadtong Pebrero 2017 ug Hulyo 2017.
Si Roldan nisugilon nga gihimo niya ang hangyo kang Osmeña human sa ilang duha ka adlaw nga mock bar niadtong Marso 3 ug 4, diin ang resulta niini kay 10 porsyento sa ilang final grade.
Suma pa niya, gamit kaayo ang 24 oras nga public library kay manirado ang library sa ilang tunghaan alas 7:30 sa gabii ug sa gabii lang siya mas makalugar og tuon og maayo.
Siya nidugang nga pinaagi niini, makadaginot og kwarta ang mga estudyante nga sama niya usahay anha magtuon sa mahalon nga coffee shops o sa mga fast food nga dunay wifi access.
Si Roldan, taga Barangay Lahug, dakbayan sa Sugbo, nitug-an nga daghan ang nag-friend request niya sa Facebook, ug nag-chat usab, ang uban mga ginikanan ug mga estudyante, nga nagpasalamat niya kay gumikan sa iyang hangyo abli na ang Rizal Memorial Library and Museum 24 oras, matag adlaw.
Si Roldan, nigradwar sa high school sa St. Theresa’s College niadtong 2014 diin usa siya ka achiever. Ang iyang 13-anyos nga manghod nga si Arth, Grade 7 student sa University of Cebu kansang pagtungha gi-subsidize sa kagamhanan sa siyudad sa Sugbo. Ang ilang inahan nga si Mergy, 40, housewife samtang ang ilang amahan nga si Arturo, 54, teller sa banko.