GI-KWESTIYON sa pipila ka konseho ang paglangkat sa katungdan sa general manager sa Cagayan de Oro City Water District (COWD) ug nangayo og katin-awan kalabot na niining panghitabo.
Atol sa gipahigayong regular nga meeting sa City Council, naghimo og special report si Kagawad Erick Salcedo kalabot na sa paglangkat sa pwesto ni engineer Rachel Beja, kinsa kanhi general manager sa COWD, diin giingong dili angayan nga tangtangon kini sa pwesto gumikan lamang sa rason nga gipa-review niini ang kontrata sa COWD ug sa Metro Pacific Investment Corporation.
“Sa akong nakita, ang mga grounds sa pagkatangtang kay engineer Beja sa ahensiya sa COWD, dili enough to terminate sa iyang position. Pagpa-review lang, imo nang e-terminate ang general manager? Unsa may dautan gipa-review niya ang contract between COWD ug ang atong Metro Pacific” pahayag ni Salcedo.
Gidugang pa usab ni Kagawad Bong Lao nga una mangayo kini sila og kopya sa termination ni Engineer Beja ug imbitahon ang COWD board aron mahatagan og katin-awan ang maong isyu.
“First mangayo tag copy sa termination order gikan sa board, second maybe kung upon receipt of that termination order atong ipatawag, invite nato si engineer Beja, ang atong mga board of directors pud para matagaan, to shed light unsay reason behind why she was terminated as general manager of COWD,” pahayag ni Bong Lao.
Nasayran nga nagdesisyon nga langkaton sa katungdanan si Beja human matud pa nga nakita sa COWD board ang mga rason nga angayan kining langkaton sama sa loss of trust and confidence human nga buot niini nga ipa-review ang kontrata tali sa COWD ug sa Metro Pacific sa Office of the Government Corporate Council, sa gihimong strategic planning sa Cebu nga wala nagpahibalo ug pagpahigayon sa Thanksgiving party diin wala nagpahibalo sa board.
Kahinumdoman nga niadtong milabay nga tuig, nigawas ang kontrobersiyal nga isyu sa supply sa tubig dinhi sa dakbayan diin giingong dili makahatag og 24 oras nag supply ilabi na sa elevated nga mga barangay ang nahisgutang ahensiya ug nisulod kini sa joint venture agreement sa Metro Pacific Investment Corporation diin giingong wala kini insaktong kunsoltasiyon ug wala misubay sa insakto nga proseso.
Nasayran nga nagpasaka usab og kaso sila si Kagawad Erick Salcedo, Teodulfo Bong Lao ug Reuben Daba aron nga ipahunong ang maong kontrata tali sa COWD ug Metro Pacific.