PARA nako usa ka dakong binoang ang nakab-ot nga hukom sa Department of Justice ( DOJ ) sa pagka absuwelto sa mga gidudahang drug lord sa kalambigitan sa illegal nga drugas.
Si Peter Lim, usa ka dakong negusyante sa siyudad sa Sugbo, kauban ni Kerwin Espinosa, ang notado sa Masbate, Peter Co, ug uban pang mga notadong tigpayuhot ug illegal nga drugas usa na ka gawasnon.
Apan dakong tamparos sa dagway nila ni DOJ secretary Vetaliano Aguirre, ug Presidente Rodrigo Duterte, ang usa ka 41 nga pahina nga resolution nga giaparobahan ni Acting Prosecutor General Jorge Catalan.
Kay matod pa, ang testemoniya sa mga reklamante nga testigos nga si Marcelo Adorco, dili magamit nga mga ebidensya batok sa mga sinumbong.
Di ba kini usa ka ginagoy ang gihimo sa DOJ, kay si Adorco ila man kini nga testigo batok sa mga akusado nga sila si Lim, Espinosa ug Co?
Dako sab kining kauwawan sa habig sa presidente. Nanghambog ug nanaad na si Duterte, nga iyang patyon ang druglord nga si Lim, inig tamak sa tarmac gikan manaog sa eruplano gikan sa byahi sa gawas nasud.
Samtang si Espinosa, mikompisal ug miangkon sa kalambigitan sa ilegal nga drugas. Ang nahitabo nahimo naman hinuong gawasnon ang mga tampalasan.
Sa maong panghitabo daghang nangasuko nga katawhan nga naglakip na sa mga tigpaluyo sa gobyerno sa presidente. Ang prayoridad man kaha sa kasamtangang gobiyerno ang kampanya batok sa ilegal nga drugas.
Apan ang nangamatay o gipatay sa ilang kampanya sama kanila ni Masbate Mayor Espinosa ug Ozamis Mayor Parojinog nanghimakak sa kalambigitan sa ilegal nga drugas.
kining maong pangitabo nakatingkag sa dunggan ug makapaduda. Mahimong magduda nga giduwaan lang sa kampo nila ni Aguirre ug Duterte ang katawhan niining pagka absuwelto ni Lim ug Espinosa? Ang ang mga ultimo sa drugas nangamatay lang.