ISIP parte sa selebrasyon alang sa Buwan sa mga Kababayen-an, aduna’y pagahimuon ang Department of Agriculture (DA) 7 nga Farmer’s Rice Outlet ugmang adlawa Biyernes, diha sa ilang buhatan sa Maguikay, dakbayan sa Mandaue.
Mamahimo nga makapalit og tulo ka mga klase sa bugas diin mokantidad og sa P38 hangtod P46 matag kilo.
Apan giklaro ni Atty. Salvador Diputado, Regional Director sa DA-7, nga wa kini nila gibuhat tungod sa sitwasyon karon sa National Food Authority (NFA) diin nagnihit ang bugas apan parte lang sa selebrasyon sa Women’s Month.
Lakip sa ilang ibaligya kining undermilled nga bugas o kining ka usa ra gigaling nga tag P38 ang kilo.
Regular milled rice nga anaa sa P42/kilo ug ang premium milled rice nga tag P46/kilo.
“Mamahimo kining mapalit sa tag duha ug lima ka kilo matag putos,” tipik pa sa anunsiyo sa maong ahensiya.
Apan gibutyag ni Diputado nga mamahimong makapalit og 10 kilos ang matag usa ka tawo ugma.
Ang mga bugas produkto sa mag-uuma sa Bohol nga gigaling sa Pilar, Bohol ubos sa pagdumala sa Bohol Federation of Farmers Cooperative (BOFAMCO).
Magsugod ang pagpamaligya alas 8 sa buntag hangtod alas 5 sa hapon.
Kon mamahimo kini nga magmalampuson, matod ni Diputado nga himuon kini nila makaduha matag buwan.
Kon kahinumdoman, di palang dugay, gikataho nga nagnihit ang bugas sa NFA nga maoy nakapasuko ni Presidente Rodrigo Duterte.
Gituohan nga adunay pamahayag ang mga opisyal sa NFA nga nakapa-panic sa mga konsumer. (HBL)