WALA mahinayon ang dry-run kagahapong adlawa sa plano untang pagpasulod na sa mga PUJ gikan sa barangay Tabunok, ug mga sakyanan gikan sa Pardo agi sa Cebu South Coastal Road.
Kini human nga pakigkitaan una ug estoryahan personal ni Land Transportation Franchising and Regulatory Board (LTFRB-7) Director Ahmed Cuizon si Mayor Eduardo Gullas.
Una niini si Cuizon nakigtagbo sa mga sakop sa Traffic Management Board sa Talisay aron hisgutan ang maong plano human nga naproblema sila sa trapiko sa dakbayan sa Sugbo tungod sa nagpadayon nga underpass project sa may dalan Natalio Bacalso Ave.
Gawas sa pagpasulod na sa mga PUJ gikan sa Tabunok ug Pardo, ang mga gikan sa Minglanilla, Naga ug San Fernando adto nalang kutob sa tumoy nga bahin sa South Coastal Road ug ang mga pasahero dawaton lang sa mga bus nga padaganon usab nga maoy modala na sa Compana Maritima.
Si Mayor Eduardo Gullas miingon nga wala siyay supak sa mga PUJ nga moagi sa CSCR sanglit nakasabot usab siya sa sitwasyon sa dakbayan sa Sugbo.
Apan ang wala niya mauyoni mao ang plano nga magbutang og laing bus nga paagion sa CSCR nga alang sa mayor makapAsamot sa kahuot sa trapiko.
Gani mipadayag og kasagmuyo si Gullas ni Director Cuizon nga wala gyud kini makig-kita kaniya ug una aron hisgutan ang mao niyang plano.
Gibutyag ni Almond Dela Pena, pangulo sa City of Talisay Traffic Operations Development Authority (CT-TODA), nga sigun sa iyang nahibaw-an walay kausaban sa plano diin aduna gihapoy bus nga moagi sa CSCR, apan kinahanglan nga ipasabot una pag-ayo ngadto ni Gullas.
Giangkon ni Dela Pena nga wala gyud magkakita ang mayor ug si Cuizon aron masabutan na ang tanan sa traffic board diin lakip unya sa panagtagbo mao si Talisay City Administrator Atty. Rudelyn Navarro.
Apan nasayran nga ang Cebu City adunay city ordinance nga nagdili sa mga PUJ sa pag-agi sa SRP.
Niini kinahanglan una nga usbon sa konseho ang mang ordinansa. (DRT)