NAGKALAINLAIN ang reaksiyon sa nahitabong pagbasura sa mga prosecutors gikan sa Department of Justice (DOJ) sa drug cases batok kang Peter Lim ug druglord Kerwin Espinosa. Naapil usab pagka-abswelto sila si Peter Co, Lovely Adam Impal, Jun Pepito, Ruel Malindangan, Max Miro ug uban pa. Si Miro bag-o lang gipatay sa Tacloban City.
Sumala nila ni assistant prosecutors Michael John Humarang ug Aristotle Reyes, nga usa na karon ka huwes- huyang ang kaso batok sa mga sinumbong. Nasuko niining maong punto si Presidente Duterte ug ubang mga opisyal sa gobiyerno tungod kay si Espinosa miangkon na atubangan sa Senate investigation nga namaligya siya og ginadiling drugas. Mismo ang iyang gipatay nga amahan, Mayor Rolando Espinosa, mikompisal nga si Kerwin druglord,di siya.
Inay nga si Justice Secretary Vitaliano Aquirre II ang mismo mo-review sa resolusyon sa iyang mga tawo, nagporma siya og panel sa pagreview sa mga kaso nga gipasaka batok kang Lim, Espinosa ug ubang mga respondents nga gikiha sa Philippine National Police-Criminal Investigation and Detection Group (PNP-CIDG).
Sa kalagut sa presidente ,siya nibahad nga kon ugaling malibre sa hingpit si Lim ug si Kerwin, si Aquirre maoy ipuli niya pagbalhug sa bilanggoan. Si presidential spokesman Harry Roque mipahibawo nga napikal kaayo si Duterte sa desisyon sa DOJ prosecutors ug miingon, “I will invoke my power of supervision and control and will review the dismissal.”
Kining maong pagbali-wala sa mga kaso nila ni Lim ug Espinosa nakapatay-ug sa kampanya batuk sa iligal nga drugas sa Duterte administration. Gipasanginlan sa oposisyon nga pinili lang ug pabor sa mga dagkung druglords ang drug campaign sa Malacañang.
Nagduda ang katawhan nga dakong kantidad sa salapi ang nabulsa sa mga tawong adunay kalabutan sa kaso. Dili usab sila makatuo nga si Aguirre wa masayud sa dagan sa imbestigasyon ingon man sa resolusyon nga gihimo sa iyang duha ka mga prosecutors. Dili kini unang kontrobersiya nga nalambigit si Aguirre busa nagtuo akong tangtangon na siya ni Duterte.
u25cf ● ●
Grabe kining giatubang nga problema ni Supreme Court Chief Justice Maria Lourdes Sereno. Hapit tanang justices wa na makauyon kaniya. Bisan gani ang mga empliyado sa korte suprema ug mga maghuhukom sa nagkalainlaing dapit sa nasud buot na nga mo-resign siya.
Sumala ni Sereno nga dili siya mo-resign kay maghuwat siya nga masang-at ang iyang kaso sa impeachment ngadto sa Senado. Gawas sa impeachment complaint anaay gi-file ang solicitor general nga quo warranto batok sa chief justice. Kon ako ang pangutan-on kinahanglan na siyang mo-resign aron dili madaut ang ngan sa Korte Suprema.
(msr1144@yahoo.com)