UNSA man ni, labok o shapol na? Gisaway ni Cebu City Vice Mayor Edgardo Labella ang “kanhi laos nga pulitiko” sa nagkamuritsing nga dagan sa trapiko diha sa south district labi pa sa Mambaling area gumikan nianang gitukod nga underpass karon. Matod ni Labella nga dili unta mahitabo ang grabeng trapik kon gitun-an pa pag-ayo sa kagamhanan sa dakbayan ug ingon man sa Department of Public Works and Highways (DPWH) ang mga alternatibong rota ug gipalapdan pa ang mga kalsada nga maagian sa mga motorista samtang ipasira ang Natalio Bacalao avenue.
Una nang gibabagan ni kanhi mayor Mike Rama ang maong proyekto gumikan lagi sa posibling masinati nga problema sa trapiko. Apan lahi usab og motibo si Rama kaniadto kay iya mang giapil ang mga flyover projects ni north district Congressman Raul del Mar.
Nitubag ang “kanhi laos nga pulitiko” nga angay untang motabang si Labella kay tipik ug kabahin siya sa administrasyon isip bise mayor. Nganong dili man usab kuno niya gamiton ang iyang koneksiyon ngadto kang Presidente Duterte aron masulbad ang maong problema? Unsa man ni, kumbati na?
Ang pagbutang sa maong proyekto diha gitumong aron masulbad ang problema sa trapiko. Ang taga DPWH maoy mangita og pundo alang ana nga proyekto. Apan kon sagulan og pamulitika sa mga lokal nga opisyal, magyagaw na. Nganong dili man tuod sila magkahi-usa ug magtinabangay aron masulbad ang usa ka problema?
Unsa may problema diha? Trapik? Nan atong pangitaan og solusyon. Kanang gi-ingon nila nga i-improve ang alternate nga mga rota pinaagi sa road widening. Aw, sayon ra kana estoryahon, apan naa tay kuwarta ana nga magasto? Bisan unsang matang sa paagi atong sagupon sama anang pagpa-agi sa mga public utilities sa South Coastal Road, atong dawaton. Kanang tanang mga sugyot apil na anang mga inamaw atong sagupon. Kon ihunong nang maong proyekto, atong hangpon. Kasamok baya ninyo.
(bobbygnalzaro@gmail.com)