CATRIONA Gray, Karen Gallman, Aya Abesamis, Eva Patalinjug, Sandra Lemonon, Vickie Rushton, Michelle Gumabao, Ena Velasco, Jehza Huelar ug Loren Mar Artajos ang giingong nag-unang mga kandidata sa 2018 Binibining Pilipinas pageant.
Sila ang gihugonhugon nga molangkat sa unom ka mga korona isip Ms. Universe Philippines, Bb. Pilipinas International, Bb. Pilipinas Supranational, Bb. Pilipinas Grand International, Bb. Pilipinas Intercontinental ug Bb. Pilipinas Globe.
Duna kahay molugwa nga wa maapil sa listahan sa itaas? Ang pagpili ug pagkorona himoon sa Smart Araneta Coliseum karong Dominggo, Mar. 18.
Duna koy nadunggan nga mga taga Cebu nga molayat sa kaulohan aron mosuporta sa mga kandidatang Cebuana. Duna say kontento na sa pagtan-aw sa TV.
May Cebuana kaha nga ma-rayna?
u25cf ● ●
Usa na lang gyud ka Biyernes ang nakaulang ug Biyernes Santo na. Asa man mo inig Semana Santa?
Basin puro bakasyon, paglingawlingaw ug pagbuhat og mga way hinungdan ang inyong himoon ug hikalimtan ang hinungdan sa kasaulogan sa simbahang Katoliko.
Kini panahon sa pagpamalandong, paghinulsol ug pagbag-o sa atong mga kinabuhi padulong sa kaayohan.
Hinoon, tungod sa kainit sa panahon, angay usab nga hatagan nato ang atong kaugalingon sa kahigayonan nga mapreskohan ug mabugnawan panagsa.
u25cf ● ●
Dihay lima ka Semana Santa nga didto ko sa Bantayan. Nagpangamay ang dagat mao nga wa sab mi mobalibad. Pero moadto gyud mi sa simbahan aron pag-apil sa mga kalihukan lakip na ang nabantog nga grandyosong prosesyon.
Human niadto, sa Kalubi-an (Leyte) na sab ko napadpad. Nitabang mig adorno sa himo-an sa pagbatbat sa katapusang Pito ka Pulong sa Manunubos.
Hangtud nga nakaapil gyud ko sa pagbatbat. Bale tulo ka Semana Santa nga nakaapil ko. Sa tungatunga ning mga higayona, nakaadto ko sa Catmon, sa Tudela (Misamis Occ.) ug syempre sa lungsod nakong natawhan sa Oslob.
Pulos mabungahon ug makahuloganon kadtong mga higayona. Karong tuiga, nagplano unta kong mobalik sa Bantayan pero may kabilinggan.
Mao nga lagmit sa Oslob ra gihapon ko moapil sa mga kalihukan sa simbahan labina sa Via Crucis nga motungas sa bungtod ug, aron di puol, makig-uban sa mga tuki o butanding matag karon ug unya. Hehe.
u25cf ● ●
Nakasubay na lang pod ko aning FPJ’s Ang Probinsyano adtong naghinapos ang La Luna Sangre. Gusto lagi kong makakita og pagtapos gyud sa usa ka teleserye kay daghan na lagi nga nisipyat.
Abi nakog duol na mahuman ang nahauna kay nagginukdanay ug nag-atubangay pa man gani og pabuthanayg armas ang mga bida ug kontrabida.
Unsa ba nga may nisulod na man sab nga bag-ong mga karakter ug mga artista? Molanat na sab ni og dugay?
Usa nako ka amiga niingon nga magpuasa ug mag-abstinensya na lang aron matapos na ang istorya.
Napul-an na ba kaha siya, nalibog na sa kadaghan sa mga artista nga nigawas ug nibabu o unsa kaha? Kataw-anan!