ARON maminusan ang bul-og sa trapiko sa habagatan sa dakbayan sa Sugbo tungod sa gitrabaho nga underpass sa N. Bacalso Avenue ug F. Llamas St. sa Barangay Mambaling, usa ka access road ang plano nga ablihan sa lokal nga kagamhanan aron makalusot ang mga sakyanan gikan sa dakbayan ngadto sa Barangay Inayawan.
Samtang sirhan na ang Caimito St., sugod karong adlawa tungod kay magpadayon na ang Department of Public Works and Development (DPWH) sa pagtrabaho sa dapit, anhi na agi ang mga motorista sa Bayabas St., eskina kini sa dili pa ang Caimito.
Matod ni Cebu City Mayor Tomas Osmeña nga wala pa sila nakasugod pagpatrabaho sa maong dalan apan gusto niini nga masugdan na kini sa daling panahon aron maminusan ang kabaga sa trapik sa parte sa N. Bacalso eskina F. Llamas St.
“Were developing an access road to connect to Inayawan,” nagkanayon si Osmeña.
Wala pay usa’y budget ang maong dalan.
Tuig 2016 dihang nangreklamo ang mga mananagat sa gibutang nga mga culvert diha sa usa ka dapit sa South Road Properties tungod kay dili na kaagi ang ilang mga bangka pagawas didto sa kadagatan.
Si Konsehal Dave Tumulak, chairman sa public order and safety committee, nagkanayon nga gipasusi pa nila sa City Engineering ang kondisyon sa access road tungod kay dugay na usab kini nga wala magamit.
Mag-agad sila sa assessment sa city engineering kabahin sa kalig-on niini ingon man butanganan pa kini nila og suga ug road signs.
Apan kon mapatuman kini ablihan kini sa peak hours sa buntag gikan sa Inayawan paingon sa South Road Properties samtang sa hapon nga peak hours gikan sa SRP paingon sa Inayawan. Anaa kini luyo sa buhatan sa DPWH.