Pulitika ang gisusi

KAPULISAN sa lungsod sa San Fernando nagtuo nga gilipat lang sila mga tawo nga nagpusil patay kang Konsehal Alexander Alicaway, pinaagi sa pagpatuo nga tulis ug drugas ang motibo.

Ang kapulisan ug pamilya ni Alicaway nagtuo nga may kalambigitan sa iyang trabaho isip konsehal ang krimen kay wa malambigit sa drugs ang opisyal.

Kini human ang cellphone ra maoy gikuha sa killer nga hayan dunay sulod nga mga impormasyon.

Apan ang kapulisan sa San Fernando wa pa mohatag og detalye sa dagan sa ilang imbestigasyon.

Si Alicaway gipusil sa duha ka mga tawo nga nagsakay og motorsiklo niadtong Miyerkules sa hapon, apan wa mailhi tungod kay pulos nag-bonnet.

Ang imbestigador nga si PO3 Jose Clair Palagtiosa niingon nga ila nang gipadaplin ang posibilidad nga may kalabotan sa drugas tungod kay wa silay report nga si Alicaway nalambigit sa illegal nga drugas.

Human sa pagpamusil, nisinggit pa ang mga killer og “hunong na sa bisyo sa drugas.”

Di usab sila motuo nga ang pagkawagtang sa cell phone ni Alicaway usa ka tulis.

Matod ni Palagtiosa nga motutok karon sila sa iyang trabaho isip konsehal sa lungsod.

Samtang si Cebu Provincial Police Director Edgar Alan Okubo niingon nga sa inisyal nga mga pamahayag sa kabanay, miyembro sa pamilya ug mga higala, sila nagtuo nga may kalabotan sa iyang pagka konsehal ang maong krimen.

Apan ila pa kining subayon sa imbestigasyon tungod kay wa mo report sa San Fernando police station si Alicaway kon aduna bay hulga nga nadawat.

“Initially, it might be work related. Yung pinaka malapit na susundan ng PNP San Fernando base on the interview of the relatives, witnesses, friends and all other possible persons na makapagbigay ng kaliwanagan doon sa nangyari,” pasabot ni Okubo.

Mao usab kini ang pagtuo sa kamaguwangang babayeng anak ni Alicaway nga si Alexandra Mae.

Matod sa anak sa interview sa SunStar Cebu nga wa silay laing mahuna-hunaan nga motibo kay way kontra ang ilang amahan.

“Pulitika ra gyoy hinungdan nga namatay akong papa,” siya niingon.

Matod niya nga ang cell phone dunay mga impormasyon nga hayan maoy hinungdan sa pagpatay sa iyang amahan.

“Nganong selpon ra man ang gikuha? Basin tua didto ang tanang ebidensiya,” nagkanayon si Alexandra Mae, graduating nga tinun-an sa biology.

Matod ni Alexandra Mae, 20, nga ang iyang amahan kanunay mosulti sa iyang mga problema ngadto sa ilang inahan nga si Maria Victoria.

Matod niya nga ang iyang amahan way planong modagan sa 2019 human siya gipugngan sa iyang mga igsuon.

Giawhag ni Alexandra Mae ang mga saksi sa paghatag og mga pamahayag sa kapulisan.

“Nganong gipatay akong Papa? Ka maayong tawo sa akong Papa,” siya nagkanayon.

Samtang si San Fernando Mayor Lakambini Reluya nihulagway kang Alicaway nga maayong tawo.

Nakahuman kini sa iyang tulo ka mga termino nga way pilde hangtod sa 2013 ug nidaug sa 2016 elections.

Wa usab siya makadungog og negatibong mga estorya kalabot kang Alicaway.

Matod ni Reluya nga wa siyay nahuna-hunaang motibo sa pagpatay sa konsehal.

Siya makigtagbo sa hepe sa kapulisan aron mahatagan og hustisya ang kamatayon ni Alicaway.

Sila si Reluya ug Alicaway ma­naglahi og mga partido.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph