GISUGDAN na ang survey works sa feasibility study sa duha ka bypass roads nga gilantaw nga makatabang pagpaluag sa kahuot sa dagan sa trapiko sa dakbayan ug habagatang Sugbo.
Ang unang bypass road moagi sa daan nga railway gikan sa siyudad sa Talisay ug motadlas sa lungsod sa Minglanilla hangtod sa dakbayan sa Naga.
Samtang, ang ikaduhang diversion road manukad sa Barangay Guadalupe hangtod sa Barangay Lahug, siyudad sa Sugbo.
Ang duha ka mga proyekto nalakip sa priority infrastructure projects sa Regional Development Council (RDC) 7 sa Central Visayas.
Si Engr. Nonie Paylado, hepe sa planning ug design sa Department of Public Works and Highways (DPWH) 7, nibutyag sa miaging buwan nasugdan ang FS sa Talisay-Minglanilla-Naga bypass roads ug karong Hunyo kini gipaabot mahuman.
Si Engr. Leslie Anthony Molina, pangu sa Second District Engineering sa DPWH 7, niingon ang ilang ulohan nga buhatan ang nagpahigayon sa feasibility study.
Matod niya, ang proyekto magsugod sa Cebu South Coastal Road dapit sa Talisay Fish Port nga isumpay pinaagi sa ibutang nga skyway paingon sa Barangay Mohon dayon himoan og on-grade highway subay sa karaan nga Philippine Railway dayon sa Minglanilla hangtod sa Naga.
Sa presentasyon ni Paylado atol sa full council nga tigom sa RDC 7 kagahapon, siya niingon nga base sa preliminary assessment sa 2nd DEO, ang proyekto gibanabana mokantidad og P1.3 bilyones alang sa on-grade highway ug mosaka hangtod sa P15.5 bilyones sa elevated highway diin apil ang pagbutang og skyway.
Sa programs, activities and projects nga giduso sa 2nd DEO sa DPWH 7 alang sa 2019, moabot sa P1.5 bilyones ang alokasyon sa maong proyekto nga giapil ubos sa Network Development Program (NDP).
Siya nidugang ubos lang sa usa ka contract package ang nagpadayon nga FS sa Talisay-Minglanilla-Naga bypass ug Guadalupe-Lahug diversion road.
Base sa preliminary assessment nga gihimo sa Cebu City District Engineering Office sa DPWH 7, ang proyekto kapin kon kulang P500 milyones ang kantidad.
Sa PAPS nga giduso sa maong buhatan alang sa 2019, P500 milyones ang alokasyon niini alang sa proyekto nga giapil sa NDP.
Apil sa proyekto ang paghimo og upat ka lane nga roadway nga maglakip sa duha ka mga taytayan nga motabok sa Guadalupe River ug Lahug River.
Kini magsugod sa V. Rama Avenue sa Barangay Guadalupe ug isumpay hangtod sa Gorordo Avenue sa Barangay Lahug duol sa bisinidad sa University of the Philippines.
Sumala ni Paylado sa higayon maablihan kini nga rota sa mga sakyanan, moluag ang dagan sa trapiko sa dan n. Escario. (SCG)