NI-WALK out si Cebu City Cong. Raul del Mar sa tigom sa Regional Development Council (RDC) 7 kagahapon ug wala nay plano nga motambong sa umaabot pa nga mga meeting.
Ang kongresista sa amihanang distrito sa dakbayan sa Sugbo nasagmuyo kay wa kini pahibaw-a sa gihimo nga mga kausaban sa programs, activities and projects (PAPS) sa Department of Public Works and Highways (DPWH) 7 base sa unang version nga iyang napirmahan.
Matod niya, ang gisugyot nga budget alang sa actual nga pagpatukod og tulo ka underpass projects sa iyang distrito nga iyang giduso kay wala giapil.
“Why would I stay there if we don’t have any voice? Never mind the vote, that is already there. We attend and we don’t have any voice. They seem to think that they are the lord and masters,” pahayag ni Del Mar nga nahinabi sa mga tigbalita sa gawas na sa function room sa Montebello Villa Hotel, siyudad sa Sugbo.
Ang mga underpass nga gi-propose tukoron sa tulo ka intersections sa dakbayan sa Sugbo-una sa dan D. Jakosalem, F. Sotto Drive, Archbishop Reyes Avenue, Gov. M. Cuenco Avenue hangtod sa Talamban proper, ikaduha, gikan sa Salinas Drive, Pope John Paul II Avenue, hangtod sa Sergio Osmeña Jr. Boulevard ug ang ikatulo manukad sa Cardinal Rosales Avenue, dan F. Cabahug hangtod sa Hernan Cortes.
Atol sa full council nga tigom sa RDC 7, gipalabang sa konseho ang kausaban nga gihimo sa DPWH 7 sa PAPs nga gisumitir niini alang sa 2019 nga giduso ni Glenn Anthony Soco, co-chair sa Infrastructure Development Committee, diin gikuha na ang appropriations alang sa aktwal nga pagtrabaho sa tulo ka mga underpass. Kini gigahinan apan alang na sa pagpahigayon og feasibility study sa tulo ka mga proyekto.
Apan suma sa kongresista nga nagdoble na kini kay nagpadayon karon ang feasibility study alang sa maong mga proyekto.
“If the FS will not be finished this year then the construction cannot go on, so, we didn’t lose anything. But if dili mo-appropriate for the actual construction work and the FS kay nahuman this year, we cannot work next year but only 2020, that is too late,” dugang ni Del Mar.
Si Engr. Nonie Paylado, pangu sa planning and design sa DPWH 7, nipasabot nga atol sa tigom sa technical working group nga giumol sa IDC-RDC 7, natuki nga kinahanglan mahimoan og feasibility study ang mga underpass project ni del Mar, kini usab ang mando sa ilang ulohang buhatan sa dinagko nga mga proyekto sama niini.
Ang termino kay giusab usab gikan sa underpass ngadto sa road capacity enhancement, dugang ni Paylado.
Si Del Mar nipadayag nga sa Kongreso na lang mohimo og kausaban sa mga proyekto alang sa iyang distrito sa higayon nga tukion na ang General Appropriations Act sa 2019.
Si Kenneth Cobonpue, chairman sa RDC 7, nipasabot ang ilang papel sa council mao ang pagtino nga ang mga proyekto nga ilang iduso kay makaayo sa katawhan sa Sugbo ug di tungod sa mga pulitiko.