NAKAHATAG og alarma ang usa ka nahabiling bag sa estudyante kagahapon mga alas 8:15 sa buntag diha sa overpass sa Baranggay Bulua ning dakbayan sa Cagayan de Oro.
Nagmapasalamaton ang mga otoridad gumikan kay dali nga gitaho sa katawhan ang maong kadudahan nga nahabilin nga butang ilabi na kay nagnegatibo usab kini sa bisan unsa nga klase sa eksplosibo.
Nasayran nga ang sulod sa maong bag pulos gamit sa eskwelahan sama sa papel lakip na usab cellular phone nga gipanag-iyahan sa usa ka Grade-V nga estudyanteng babaye diha sa Bulua.
Nasayran nga daling nireport sa Police Station 7 (PS7) sa Bulua ag guwardiya sa maong overpass nga nailang si Gone Montejo kalabot na sa nakitang gisuspetsahang bag.
Gi-respondehan usab kini sa mga otoridad sa PS7 sa Bulua ubos sa superbisyon ni Police Chief Inspector Gil Agpaoa lakip na usab sa tinugyanan sa Explosive Ordnance Disposal (EOD) ug swerteng nag negatibo kini sa bisan unsang klase nga eksplosibo.
Gibutyag ni Bulua Traffic Enforcer Angelo Cornero sa pakighinabi sa SunStar Superbalita nga nabalaka kini sila sa dihang nalabyan sa kauban usab nga traffic enforcer, Rogelio Caballero, ang maong itom nga bag diha mismo sa overpass hinungdan nga gireport dayon ni nila.
“Paglabay namo naa na diha, mao to’ng among gi-abog pud ang naglingkod diha kay maniguro ta ba, di ta magkumpiyansa,” pahayag ni Cornero.
Sa pakighinabi sa SunStar Superbalita ngadto na kay SPO1 Hermilo Abao, head Operation PNCO sa PS7, mapasalamaton kini sila nga negatibo ang maong gisuspetsahang butang lakip na usab sa katawhan nga nagpakabana sa pagtaho gyud dayon sa ilang buhatan.
“Pasalamat ta kay negatibo, ang sulod sa maong bag mga gamit sa estudyante, cellphone, not functional ang cellphone,” saysay ni Abao.
Padayon usab sila nagpahimangno ug nanawagan sa katawhan sa pagtaho dayon sa ilang buhatan kon ugaling adunay makitang mga butang nga kadudahan.
“Panawagan nato sa katawhan nga kung ugaling duna moy makita nga mga kadudahan nga bagahe, bag package dinha ayaw nalang ninyo hilabti, e-report gyud dayon sa pinakaduol nga kapolisan o kaya sa atong traffic enforcers ug barangay officials para sila ang manawag sa atong EOD unit sa Cagayan de Oro City Police office para sila ang moresponde sa maong kadudahang butang” dugang ni Abao.
Kadumdoman nga dunay natigayon usab nga laing bomb scare niadtong Huwebes sa gabii diha sa may Velez street diin usa ka bag ang nahabilin nga pulos personal nga gamit ang sulod niini.