NI-WALKOUT si Kong. Raul del Mar sa tigum sa Regional Development Council (RDC) dihang iyang nabal-an nga tulo ka proyekto alang unta sa iyang distrito dinhi sa Syudad sa Sugbo gitangtang sa agenda.
Imbes klarong proyekto nga nagkinahanglan og suporta sa RDC, giduso hinuon ang paghimog feasibility study alang sa duha ka bag-ong dalan.
Ambot, maglibog ko unsang klase mga performance sa RDC kining babagan ang aktwal nga mga proyekto kay mas gusto silag pagtuon. Mag-usik na sab og panahon sama sa miaging administrasyon nga igo lang mag-no left turn ug nangguba sa mga island sa kadalanan isip sulbad sa kahuot sa trapiko.
Ingon niini ang nahitabo ubos sa liderato sa RDC nga kaalyado ni Presidential Assistant for Visayas Mike Dino. Unsaon nga kaalyado man gud kini si Kong. Del Mar kang Mayor Tomas Osmeña.
Bisan unsaon pagtuyok ang istorya, gisagulan gyud og politika ang decision sa RDC.
Tungod niini, luoy kaayo ang Syudad sa Sugbo. Imbes makapadayon na kita sa pagpakanaog og mga proyekto nga makaayo sa syudad, dia na man say laing Operation Babag diha na mismo sa RDC.
Unsaon nga di maklaro nga wa man sab motago ang kampo ni Dino sa ilang pagsuporta sa oposisyon sa Syudad sa Sugbo ug pagbatok sa mga proyekto ni Mayor Osmeña.
Ang kampo sa mayor man gud naninguha nga madayon ang lain-laing mga proyekto. Tinuod, moresulta sa kahuot sa trapiko kining maong mga proyekto karon, apan nakasabot ang publiko nga gikinahanglkan kini.
Mas mo-appreciate sila nga magtinabangay ang mga politiko nga ma-alibyo ang mga problema samtang gitrabaho pa ang maong mga proyekto.
Pananglitan kining underpass sa Mambaling. Imbes mangitag alibyo, magsigig basol ang oposisyon kay ngano daw gidayon ang way hinungdan nga underpass?
Samtang nangataki si Bise Mayor Ed Labella ug moingon nga papel sa mayor ang pagpangitag paagi, hilom nga nakigsabot si Konsehal Dave Tumulak sa parokya sa Punta Princesa aron maluag ang trapik sa eskina Sabellano ug F. Llamas.
Moguwa hinuon nga pulpol ang oposisyon kon kaayuhan ang hisgutan.
Sa paninguha sa grupo ni Dino nga ipaguwa nga way agi ang mayor inig abot sa 2019, mas mailhan na hinuon sila nga maoy tigbabag tungod lang sa politika.
Ambot nganong wala makasabot ang kampo ni Dino nga karon unta ang panahon sa pagpakitang-gilas.
Pananglitan, maayo man kining ideya nga Malasakit Center diha sa Vicente Sotto Memorial Medical Center (VSMMC), apan ayaw sab biya-e dayon human sa inagurasyon kay madaot si Presidente Rodrigo Duterte.
Siguroa nga dunay pundo intawon ang maong proyekto aron walay magbagulbol.
(@anol_cebu sa Twitter)