2 bomb scare gikaalarma

DILI hilabtan ug i-report gayud dayon sa mga otoridad kung aduna’y makitang kadudahang butang kini ang padayon nga pahimangno ang kapulisan ilabi na ang tinugyanan sa Explosive Ordnance Disposal (EOD) ngadto na sa katawhan sa pagbinantayon ug mamahimong responsable sa isigka-kaugalingon.

Nasayran nga duha ka mga sunod-sunod nga bomb scare ang natigayon human usab nga aduna’y gikatahong kadudahan nga butang nga nahabilin sa duha ka managlahing dapit nga nakahatag og ka-alarma sa katawhan.

Sa pakighinabi sa SunStar SuperBalita ngadto na sa team leader sa bomb squad ilabi na sa Swat (Special Weapons and Tactics) nga angayan nga magbinantayon ang katawhan sa palibot ug sa kanunay nagmahimangno nga itaho gyud dayon kung adunay mga kadudahan nga mga butang o personalidad.

“Magbantay lang ta kanunay sa palibot kung mahimo kung naa’y mamatikdan man galeng e-report gyud dayon sa nearest police station, dili hilabtan, pero kita pud magbaton pud ta’g security sa atong kaugalingon,” pahayag niini.

Hangyo usab niini sa katawhan nga mamahimong responsable ilabi na nga kung mahimo bantayan ang mga gamit aron nga dili kini makahatag og ka-alarma ngadto na sa katawhan.

“Unta kung naa ta’y mga gamit kanang mabiyaan nato dili nato bisan asa ipangbilin lang kay bisan negative siya kanang maka crate siya’g kahadlok sa mga tawo bisa’g wala’y terrorism pero na terrorize na atong katawhan kung mahimo lang magbantay gyud ta sa atong palibot ug sa atong kaugalingon” dugang pa niini.

Lakip usab nga nanawagan ang kapolisan ilabi nan i SPO1 Hermilo Abao kinsa mao’y nagresponde usab sa maong panghitabo diha sa Bulua nga dili gayud hilabtan ang makita nga kadudahan nga butang ug dili magmakuli sa pagtaho sa bisan kinsa nga pweding maduolan aron nga malikay gayud sa kakuyaw.

“Kung ugaling duna moy makita nga mga kadudahan nga bagahe, bag package dinha ayaw nalang ninyo hilabti, i-report gyud dayon sa pinakaduol nga kapolisan o kaya sa atong traffic enforcers ug barangay officials para sila ang manawag sa atong EOD unit sa Cagayan de Oro City Police office para sila ang moresponde sa maong kadudahang butang” dugang pahimangno ni Senior PO1 Hermilo Abao.

Nasayran nga na-alarma ang mga lumalabay human nga aduna’y napalgang bag nga nahabilin sa overpass sa Bulua ning siyudad diin swerteng negatibo kinu ug nabilin lamang kini nga gamit sa us aka Grade-V nga estudyante.

Samtang natala usab ang laing bomb scare sa may Velez sa mismong duol sa buhatan sa Cagayan de Oro Press Club human usab adunay laing bag nga nahabilin ug pulos sulod niini personal nga mga gamit.

Padayon nga nagpahimangno ang mga otoridad sa kanunay nga alerto ug motabang kanila pinaagi sa pagbantay sa tagsa-tagsa ka mga kaugalingon ug pagtaho gyud dayon sa ilang buhatan kung adunay kadudahang mga butang o lihok sa usa ka tawo.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph