"ACCUSING ourselves is the first step toward forgiveness," ang espirituhanong pagdasig ni Pope Francis ngadto sa katawhan niining pagsaulog sa diwa sa kuwaresma.
"Nakasala ako," kini ang matinud-anong pasangil sa imong kaugalingon mismo isip maoy pinakaimportanteng kinaiya nga huptan sa usa ka kristiyano ug kini maoy kabahin sa kaalam sa simbahan.
Dili kinaiya sa mga kristiyano nga mamasangil ngadto sa uban. Kay ang mga Kristiyanos andam mobiya sa mga kaligutgot, kahiubos, kayugot ug pagdumot ngadto sa uban.
Ug andam mopasaylo ngadto sa nakasala kanila aron mas matagamtaman ang tinuod nga pasaylo sa Ginoo.
Sayron nato ang pag-ampo ni Azariah, miingon siya, "Do not let us be put to shame, but deal with us in your kindness and great mercy. Deliver us by your wonders, and bring glory to your name, O Lord,"
Ang kinaiya nga gipakita ni Azariah, bisan inosente siya sa iyang gibuhat nga krimen siya gisilotan, apan ang iyang gibuhat mao ang pag-angkon sa iyang kaugalingong sala nga nabuhat.
Nga ang mga katawhan unta nga nagtoo kang Kristo Jesus adunay susamang kinaiya sama kang Azariah nga naghatud kanato ngadto sa sakramento sa paghinulsol.
Malipay ang Ginoo ngadto sa mga tawong dunay kasingkasing nga mabinasulon ug mapasayluon ug labaw sa tanan modawat sa iyang kaugalingong sayop. Kay miabot na ang panahon sa paghinulsol. Panahon na karon sa katagbawan alang sa atong mga kasal-anan ug pagpangita sa kaluwasan.
Busa, ang diwa sa kuwaresma usa ka balaang higayon aron ang mga Katoliko ug ubang pang Kristiyanos sa tibuok kapupud-an moluhod atubangan sa tiilan sa krus ug aron mamalandong sa mga sala nga nabuhat padulong ngadto alang sa tiunay ug halawom nga pagbalhin ug pag-usab.
Sa laktod, ang kuwaresma nagtabang nato aron ang matag usa makaamgo nga kitang tanan makasasala. Ang atong dakung sala mao ang pagpalayo sa atong mga kasinatian sa kinabuhi uban ni Kristo ug ang pagsalikway sa tawag sa pagkabalaan.
"Fervent repentance is necessary." Metanoia, gikan sa pinulongan nga Greek, kung sa ato pa "Pagbag-o sa hunahuna." Ang pagbasol ug paghinulsol dili lang ang pag-ila ni Kristo kung dili mao ang kahiusahan sa hunahuna ug pagbati ug sa kalag ngadto sa presensiya ni Kristo.
Ang paghinulsol mao ang pagpakamatay alang kang Kristo, ang Dalan, ang Kamatuoran ug ang Kinabuhi.
Nag-ingon ang Ginoong Diyos, "Paghinulsol kamo ug biyai ang inyong mga sala aron dili kamo mangamatay. Isalikway ninyo ang tanan ninyong sala ug bag-oha ang inyong kasingkasing ug hunahuna," Ez. 18:31)
Kay nag-ingon ang Ginoo, "Hinulsoli ug biyai ang inyong mga sala kay hapit na maghari ang Diyos," ang singgit ni Juan Magbubunyag didto sa disyerto.
Human si Hesus gitental ug mibalik siya sa Galilea uban sa gahum sa Espiritu Santo ug sukad niadto si Jesus misugod pagwali nga nag-ingon, "Hinulsoli ang inyong mga sala kay hapit na maghari ang Diyos!” Mateo 4:17.
Sa katapusan, si propeta Joel kanunay naghisgot sa iyang pag-ingon, nag-ingon ang Ginoo, "Apan bisan karon, paghinulsol kamo sa kinasingkasing ug balik kanako nga magpuasa, maghilak ug magbangutan. Gisia ang inyong kasingkasing inay ang inyong bisti. Balik sa GINOO nga inyong Diyos kay maluluy-on Siya kaayo, mapailubon ug matinumanon sa saad; andam Siya sa pagpasaylo ug sa dili pagsilot," Joel 2:12-13.
(Feedback/comment i-text sa 09109006290)