Luzano: Absuwelto.. Baro manen a kontrobersiya!

ABSUWELTO – daytoy ti makapleng a kontrobersiya ti kasla kimat ken gurruod a simngat iti baet dagiti agdama a kontrobersiya ditoy pagilian. Simmingit ti balikas nga ABSUWELTO iti rengngat dagiti agsasamusam a kontrobersiya iti agdama kas koma kadagiti sumaganad: Sereno impeachment; atras-abante nga barangay ken SK election; napabaro a Tokhang; panagre-resign dagiti appointees ni Digong; tensiyon iti baet da Sara ken Alvarez; CHR kontra Digong; Dengvaxia ken sinno dagiti rumbeng a madusa; plano a joint venture ti China ken PH; kasasaad dagiti OFWs nangruna sadiay Middle East; Divorce bill; PH ken ICC, ken adu pay a kontrobersiya ita. Ngem sakbay nga intay basnutan ti isyu ni ABSUWELTO…intay man biit araduen ken suyuden dagiti nasingitanna a kontrobersiya.

***

Sereno Impeachment/Resign move: agpapan ita, matagtagiuray pay laeng no ania ti rumbeng a mapasamak. Adda agkuna a rumbeng a ma-impeach tapno maidepensa ni CJ Sereno ti bagina idiay impeachment court (Senado). Ti banglesna, mismo a katrabahona iti hudikatura ti um-umsiag a rumbeng kano nga aglusulos laengen tapno di manayonan ti pakaibabainanna. Kuna met ti dadduma, masapul a maikkat koman iti akemna ta adda dagiti nalabsing idi naapointaran daytoy. Ngem nabatad ken natibker a kas katangken ti marmol ken nabiag a bato ti sungbat ni CJ: “Saanak nga aglusulos! Hindi ako magre-resign!”. Urayentayo laengen pards no ania ti sumaganad nga eksena ti teleseryeda.

***

Barangay-SK ekection: atras-abante latta. Suspense kunada. Kuna ti Lower House, maitantan wenno umatras ti eleksiyon inton Oktubre 2018. Basnot met ti dadduma, rumbeng a matuloy koman inton Mayo 14, 2018. No ti idanaganda, kunada... ket ti drug money a maaramat kano kadagiti pasurot ti illegal drugs tapno adda latta manok dagiti lords kadagiti barangay. Ribu a barangay kapitan ken kagawad ti adda kano iti listaan ni Digong panggep iti droga. Tapikda: no adda kinapudnona a karaman dagitoy iti droga…rumbeng ngarud a matokhang wenno masaklanganen iti kaso ken tumutop a dusa. No nakasuanen dagitoy, didan makataray pay inton eleksiyon, saan aya? Umdas met ngata ti ebidensya kontra kadakuada? Next chapter, pards.

***

Napabaro a Tokhang: addaan kano iti ngipen ngem MAKATAO. Hmm..kasla naannayas ti operandi. Ngamin ket katokenda ti taeng ti suspect. Mabagaan para iti panagbalbaliwna. Ngem no adda agtubngar ket agarmas…natural, adda maipatli. Kas kanayon a kunkunada – natay ta limmaban. Pimmigsa ti PNP ken CIDG a mangipatungpal kadagiti addang kontra droga ken dadduma a krimen gapu ta naipaiman kadakuada iti akem a panangiruar iti subpoena (subpina). Ti sugpetna, pards…adda naipadamag itay nabiit nga adda kano uppat a pulis (nabigbigen dagditoy – P01 ken P02) a kameng ti nagmisyon kontra droga idiay Bulacan ti naakusaran a nang-rape iti dua-bulan a masikog (kaub-ubinganna a misis nga addaan anak a dua’t tawenna laeng). “’Nia a klase ti pulis dagita? Saan aya a sinasairo dayta nga aramid? Piman met dagiti kameng ti PNP nga addaan nadalus a serbisyo ken kababalin. Rumbeng a mapatawan koma dagita iti kadagsenan a pannusa iti kabiitan a panawen. Pwe!

***

Resignation issue: itay nabiit…nagsasaruno ti panagre-resign dagiti appointees ni Pres. Duterte. Nakaskasdaaw..ngem adda kano bukodda a rason. Ngem ti nasiriptayo, naglusulosda kalpasan a nairaman ti naganda kadagiti naibulgar nga anomalya iti nagduduma nga ahensiya ti gobyerno. Awandan…nupay adda met dagiti naikkat ngem nayakar laeng gayam kas koma kada Faeldon ken Diño. Adda met dagiti naikkat gapu iti napasamak iti maysa a Pinay a napapatay ken nai-freezer pay idiay Kuwait. Tsk tsk…panagkitami, adu pay dagiti agpurpuro a mabasnutan ni Digong. Ti ayan ti burburtia ket ti panag-resign ni Chairman Aiza “Ice” Seguerra manipud National Youth Commission. Ti kuna ni Aiza…naglusulos kano tapno makapag-concentrate iti showbiz career daytoy. Ngem adu met dagiti agar-arasaas nga amangan ta saanen a naragsak ti singer iti poder ti Duterte Administration. Sapay koma ta tsismis laeng.

***

Sara vs. Alvares: nagbanag met a kontrobersiya ti tensiyon dagiti dua. Ngem iti panagkita ti kaadduan…pulitika ti gapuna. Nagbinnasnotda a kasla ubbing. No sinno kano ti agsasao iti saan nga umno, agresign. Ngem iti udina..nagpakumbaba met laeng ni Alvares. He he…kasanom aya met ti lumaban iti mismo nga anak ti presidente? Ditay ammo no ania ti talaga a panggep ni Alvares. Ti kaudian nga isyu ket ti “full support” kano ni Sara ken ni Special Assistant to the President Christopher “Bong” Go no tumaray para senador. Nagyaman met ni Go ngem nasapa pay kano tapno mangeddeng. Adda met daplis a natiliwmi…nga awan kano ti mabalinan ni Go no isu ti kayat ni Pres. Digong. He he..agaammotayon, pards. No asidegka iti makan…ay ket mamutiktik ti bitukam. Ngem kuna met daydi lolok: no asidegka iti dalikan, sika ti umuna a mauram…kas koma iti daytoy numo nga agpapaimbag pay laeng gapu iti pannakauram ti mestizo a rupana, pwaa!

***

CHR ken ICC issue: dimmegdeg ti tensiyon iti baet ti CHR kenni Pres. Duterte itay kallabes. Nangruna iti isyu nga adda kano naisawang (manen) ni Digong (kas imbasnot ni Ms. Eta Rosales) a saan a nagustuan dagiti makakannigid nangruna kadagiti babbae a kamengda. Ngem kas sangga met dagiti adda iti sibay ni Digong…angaw laeng kano dayta. Sabagay, saan aya nga adda pay nakuna idi ni Digong a kadagiti simmuko nga Amasona…ipanna kano ida ipassiar idiay Hongkong! Adda pay pabalay dagita a rebelde. Haayy biag... ti la adda a mapaspasamak a kontrobersiya. Iyam-amaktayo nga agbunga dagita iti pannakasitaktak imbes a panagtitinnakunaynay ken panagkaykaysa. Ti angpepna, pards…simminan ti Pilipinas manipud iti Rome Statute... ti tratado a nangbukel iti International Criminal Court – ICC. Epektibo kano a sigida ti kanuna nga addang ti administrasyon Duterte. Kinuna pay ti presidente nga adda kano kunniber (sabwatan) dagiti UN special rapporteur tapno paruarenda a nadangkok daytoy ken aglablabsing iti human rights gapu iti extra judicial killings iti anti-drug-warna.

***

Dadduma pay a kontrobersiya: Dengvaxia – matagtagiuray no anianto ti banag ti dagiti kaskaso a nagamulo kontra kadagiti sigud nga opisyales ti gobyerno idi panawen ni Pres. Noynoy. Nairaman kadagiti nakasuan ti sigud a presidente. Inayontayo pay ti isyu ti kunkunada a joint venture ti Pilipinas ken China iti exploration iti west Phil. Sea. Parikut idiay Midle east, divorce Bill ken dadduma pay. Ngem ti kadagsenan ket ti pannaka-absuwelto kada Kerwin Espinosa, Peter Lim, Peter Co ken dadduma pay babaen ti DOJ. Kuna dagiti nagimbestigar – National Prosecution service..imbaseda ti resolutionda kadagiti naawatda nga ibidensiya. Addan mosyon ti CIDG. Kuna met ni DOJ sec. Aguirre…saanda pay a naabsuwelto. Kuna met ni Pres. Digong: “I will invoke my power of supervision and control and will review the dismissal!” In short.. mismon a ti presidente ti nagkuna a personalnan nga adalen ti nakuna a kaso. Adda pay insilpo ni Presidential Spokesperson Harry Roque a kinuna kano ni Digong a no makalasat dagita a tattao iti kasoda iti droga, ni kano DOJ Sec. Aguirre ti maisukat ken maibalud. He he.. Ala, urayentayo dagiti pasamak appomi ta grabe a nakiro! Adios mi amor, ciao… Mabalos.
style="display:block; text-align:center;"
data-ad-layout="in-article"
data-ad-format="fluid"
data-ad-client="ca-pub-2836569479021745"
data-ad-slot="1977900730">



style="display:block; text-align:center;"
data-ad-layout="in-article"
data-ad-format="fluid"
data-ad-client="ca-pub-2836569479021745"
data-ad-slot="4158864647">


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph