UNSA man ang makasulbad sa suliran sa kahuot sa trapiko sa syudad sa Sugbo? Sa mga bugoy pa mao kini ang pangutana nga nagtangag og dakong question.
Kon sa sakit pa ni, daghan na ang misugyot og nagkalain-laing mga tambal. Si Cebu City Mayor Tomas Osmena nangusog sa Bus Rapid Transit (BRT) project kansang balor nisaka gikan sa P10.6 bilyunes ngadto sa kapin sa P16 bilyunes tungod sa road right of way.
Si Presidential Assistant for the Visayas Mike Dino nisugyot sa usa ka light railway transit (LRT) system. Wa nay road right of way kay adto mag-agi sa ibabaw sa mga karsada.
***
Si Kongresista Raul del Mar sa Cebu City north district, ang nagpasiugda sa pagpatukod sa pipila ka mga flyovers dinhi sa syudad, nisugyot sa mga underpass projects aron pagsulbad sa kahuot sa trapiko sa siyudad.
Gibabagan sa miaging administrasyon ug sa pipila ka mga sector sa katilingban ang iyang dugang mga flyover projects, busa gisugyot niya ang mga underpass. Kon di mahimo sa ibabaw, ari agi sa ilawom sa yuta, matod pas taga Cabadiangan.
Sa Metro Manila ug sa ubang mga dagkong syudad sa laing nasud, hasta sa pila ka andana nga mga flyovers ug mga skyways. Ang subway system sa New York sa Estados Unidos pipila ka andana ilawom sa yuta. Nganong di man nato kini mahimo dinhi sa syudad sa Sugbo?
***
Kon mahinayon, ang unang underpass system magsugod sa D. Jakosalem St., lapus sa ilawom sa F. Sotto Drive hangtod sa Archbishop Reyes Ave., Gov. M. Cuenco Ave. ug adto gawas sa Talamban proper.
Ang ikaduhang magsugod sa Salinas Drive lahus sa Pope John Paul II Ave. hangtod sa Sergio Osmeña Jr. Blvd., samtang ang ikatulo magsugod sa Cardinal Rosales Avenue lahus sa F. Cabahug St. Hangtod sa Hernan Cortes St.
Kining tulo ka proyekto mag-agi ilawom sa nahisgutan nga karsada apan adunay evit ug entrance sa mga eskina. Kay ilawom sa yuta, sama sa LRT, di na makagastog dako alang sa road right of way.