WALA unta magpaklaro ang Office of Presidential Assistant for Visayas (OPAV) sa ilang pagsuporta ug pagmaniubra pabor sa oposisyon sa Syudad sa Sugbo kon moinsister ang iyang mga tawo nga way kolor sa politika ang ilang pagbabag sa mga proyekto ni Kong. Raul de Mar.
Moguwa na hinuon nga tawo-tawo lang sa OPAV kining mga lider karon sa Regional Development Council (RDC).
Di man na mahimong daugon lang sa propaganda, intawon. Ang propaganda man gud sama na sa pintal. Kon bati ang balay, bisan unsaon pa nag pintal, bati gyud.
Kon klaro ang pamulitika, bisan unsaon pa nagpintal nga wa kintahay politika, molutaw man gyud.
Lasaw
Nagsigi bitaw kog basa sa mga pagsaway sa mga proyekto nga gisuportahan ni Kong Raul del Mar apan gisalikway sa RDC ug OPAV, diay niingon nga angayan untang dugay na gipatuman ang pagpalapad sa atong kadalanan.
Ambot kon di ba kaha mas dakong kantidad ang magamit sa road-right-of-way kon iduso gyud nato ang pagpalapad sa dalan.
Kini lang daan ang Gorordo Avenue labi na ang eskina padung sa Archbishop Reyes.
Gibabagan kaniadto ang giplanong overpass sa maong dapit. Karon, kining underpass na sab ang gibabagan.
Apan haom ba ang pagpalapad sa maong dalan?
Kon ang resulta nga kahuot sa trapiko ang wala nato magustohi sa overpass ug underpass, di diay makatrapik ang pagpalapad sa dalan?
Gawas pa, mosugot kita nga atong mapahakan ang simbahan sa Asilo, labing menos duha ka mga hotel, ug ang ancestral house sa mga Garcia?
Ang atong punto kay lasaw ug mabaw ang mga rason nga giduso kay igo man lang kini pang-propaganda isip suporta sa pamulitika sa oposisyon sa Syudad nga suportado ni OPAV.
Tinabangay
Ang nakapait karon kay tungod niining akong mga punto, isipon dayon ako nga kaatbang sa politika. Di man unta ako politiko ug nag-apas lang kita nga mahapsay ang trapiko sa Syudad sa Sugbo.
Kay ngano mang di na lang motabang kay sa niining magsigig babag?
Ang ako gyung nakita nga maayong ehemplo mao ang kalampusan ni Konsehal Dave Tumulak diha sa eskina A Sabellano ug F. Llamas diin iyang nakumbinser ang parokya, inabagan ni Brgy. Grace Baquero, nga paagion sulod sa parking lot sa simbahan sa Lourdes ang mga sakyanan nga gikan sa Habagatan nga moliko sa tuo padung sa F. Llamas kay ari moagi sa Maria Gochan.
Layo pa man kaayo ang piliay sa 2019. Duna pa gani posibilidad nga di kini madayon.
Alang kanako, mas maayo unta kon imbes modaot sa mga kalampusan sa kaatbang, maninguha na lang sa ang oposisyon sa pagmugnag ilang mga proyekto nga maka-complement sa mga proyekto sa uban.
(@anol_cebu sa Twitter)