AMBOT og wala na ba kaha mayabag kining kasamtangang administrasyon nga ang mga miangkon nga druglord og apil sa pork barrel scam nga naglambigit sa bilyones ka pesos gikan sa kaban sa atong gobiyerno mao naman hinuon ang mga nahimong saksi pabor sa gobiyerno aron paglutos sa uban nga nakakomiter og susamang kasal-anan.
Si Kerwin Espinosa, kinsa miangkon nga usa ka druglord, maoy gigamit nga saksi batok nila ni Senator Leila De Lima ug negosyanteng Peter Lim sa illegal drug trading. Ang panel of prosecutors sa Department of Justice (DOJ) mi-dismiss sa kaso nila ni Espinosa ug Lim. Nagtulod-tulod na ang kapulisan ug prosecution sa maong isyu. Nagkanayon ang mga prosecutors nga wala sila makakita og igong basihanan ug sukaranan nga isang-at ang kaso ngadto sa hukmanan gumikan kay huyang ang mga ebidensiya sa mga imbestigador sa Criminal Investigation and Detection Group (CIDG).
Kusganong gisaway ang DOJ sa maong isyu. Naputos og pagsaway si Justice Secretary Vitaliano Aguirre II. Daghan ang nagduda nga nasubornohan ang mga prosecutors. Nasuko usab si Presidente Duterte sa pagka-dismiss sa kaso nila ni Espinosa ug Lim.
Wala pa gani molurang ang maong isyu, dia na poy lain isyu nga nakapa-isa sa kilay sa publiko. Mao kining pagdawat sa DOJ ni Janet Lim Napoles sa witness protection program sa kagamhanan aron maoy mamahimong saksi batok sa mga magbabalaod nga nahilambigit sa pork barrel scam. Giila si Napoles nga “queen of pork barrel scam”. Napriso na kini siya karon apan dili gumikan sa pork barrel scam kon dili tungod sa serious illegal detention ug kidnapping sa iyang bata-bata nga Benhur Luy.
Daghan nang mga senador ug kongresista ang na-imbestigahan sa DOJ apan sila lang si Senador Bong Revilla, Jinggoy Estrada ug Juan Ponce Enrile ang napasakaan og kaso sa Sandiganbayan atol administrasyon ni Presidente Aquino. Ang uban wala na moirog ang ilang mga kaso.
Ang akong nahibaw-an aning state witness mao kadtong less guilty. “Less guilty” ba silang Espinosa ug De Lima? Ambot lang. (bobbygnalzaro@gmail.com)