KAPULISAN sa siyudad sa Sugbo nihulagway nga wala ra makatandog sa dagan sa trapiko sa siyudad ang gihimong transport strike sa Pinagkaisang Tsuper at Operator Nationwide (Piston) kagahapon.
Pasado alas 9:00 sa buntag gisugdan sa Piston inubanan sa Bayan Central Visayas ang ilang programa gawas sa Land Transportation Franchising and Regulatory Board (LTFRB) 7 aron ilang kundihon ang jeepney modernization program sa gobiyerno nga gisugdan sa pagpatuman niadtong Enero.
Sunod nilang girombo ang dalan Colon diin didto sila nagdugay ug ilang gipadayag ang kasagmuyo sa pamunoan ni President Rodrigo Duterte.
Matod ni Sr. Supt. Joel Doria, hepe sa Cebu City Police Office (CCPO), nga wala ra makabalda sa dagan sa trapiko ang gihimong transport strike sa Piston gani nangandam silag mga sakyanan aron mo-rescue kung dunay matanggong mga pasahero.
Gibanabana nga moabot ngadto sa 50 ka nga raliyesta ang nakita sa CCPO nga mihawa ra usab dayon pag abot na sa udtong tutok.
“Peaceful naman yung pag conduct nila ng rally at wala tayong nakitang problema at wala ring epek ang kanilang transport strike,” matod ni Doria.
Nagpasalamat siya nga wa mohimo og kasamok ang mga reliyesta nga nahimong hapsay ang ilang rali. (AYB)