PATAY na ang 3-anyos nga batang babaye sud sa ospital samtang gitambalan human gidauban sa iyang kaugalingon nga amahan nga hubog.
Ang insidente nahitabo alas 10 sa gabii niadtong Dominggo didto sa ilang panimalay sa Purok 26, Malagamot, Barangay Panacan, Davao City.
Nailhan ang suspek nga si Randy Nueva Cadiente, 44, minyo, construction worker, kinsa langgo sa ilimnong makahubog niadtong mga taknaa.
Sumala sa testigo nga si Leonardo Contemplo Abli, 54, nga mga alas 8 sa gabii miagi siya sa balay sa suspek diin gihanyagan pa siya niini nga mag-inom sila, apan mibalibad siya.
Dihang nakatulog na si Leonardo, kalit siyang nakamata dihang iyang nadunggan nga perting hilak sa 3-anyos nga biktima hinungdan nga
iya kining gitan-aw.
Nakurat siya dihang nagdilaab na sa kalayo ang lawas sa bata, maong iyaha kining gidagan ug giyab-an og tubig dayon nanawag siya og Central 911 ambulance.
Gilayong gitabang ang bata sa mga doktor sa Southern Philippines Medical Center kinsa anaa sa kritikal nga kahimtang.
Sumala sa suspek nga wala na siya nakabalo sa iyang gihimo, human gisapot siya sa bata kay giingong nagsige kini og hilak.
Sumala ni Chief Inspector Emerson Pugong, hepe sa Sasa Police Station, nga gituohang hinungdan sa kasuko sa suspek ang pagbulag nila sa ilang asawa.
"Allegedly, hiwalay sila sa kanyang asawa, and nasa Malungon, Sarangani Province itong asawa niya during the incident," sulti ni Pugong.
Narekober sud sa balay sa suspek ang usa ka galon nga maoy gisudlan sa kerosene (gas) ug usa ka disposable lighter.
Alas 6:30 kagabii, Lunes, giingon sa kapulisan nga patay na ang bata tungod sa grabeng paso nga naangkon.
Karong adlawa, ipasaka ang kasong Parricide batok sa suspek didto sa korte human ilang nasikop.