GIAMENDAHAN ni Davao City Mayor Sara Duterte-Carpio ang angay makapahimulos sa Lingap Para sa Mahirap Program sa lokal nga kagamhanan sa Davao City.
Usa sa mga gitumbok sa pag-amenda nga di gayud makahimulos sa libre nga tambal ug pagpalubong sa mga minatay ang mga miyembro sa New People's Army labi na kung nasakit ug nasamdan sila sa giyera batok gobyerno.
Kini ang gitin-aw ni Mayor Sara Duterte-Carpio human iyang gilagdaan niadtong Marso 14, 2018 ang Executive Order (EO) No. 7 series of 2018.
Nakalatid sa EO ang pag-amenda sa EO No. 35, series of 2016 sa mga basihan aron makahimulos sa programa sa dakbayan.
“There is a need to amend Section 3 of Executive Order No. 35, series of 2016 or the coverage of Lingap para sa Mahirap Program to further strengthen the program’s processes and to ensure the efficient delivery of its services to qualified residents of Davao City,” sumala ni Mayor Sara pinaagi sa City Information Office (CIO).
Gawas sa mga NPA, di sab makapahimulos ang mga motorista nga biktima sa disgrasya labi na kung wala kini mituman sa balaod sama pananglit sa wa paggamit og helmet ug pagsupak sa speed limit sa dakbayan ingon man ang pagmaneho nga hubog.
Di sab makapahimulos ang mga tawo nga bisan masakiton, mihimo gihapon kini og salaod tungod sa kabugoy lakip nga mga maternity cases partikular niini ang pagpakuha sa gisabak.
Ang Lingap Para sa Mahirap Program gituyo og mugna sa lokal nga kagamhanan ning siyudad aron maoy makatabang sa mga naglisod nga Dabawenyo sa hisgutanang medikal ug funeral assistance.