"BISAN og produkto ka sa broken family, bisan og pobre ta, di gyud na siya maoy idahilan, hinuon manlimbasog, mangita'g mga pamaagi aron makab-ot nimo ang imong mga pangandoy."
Kini ang madasigong pulong nga giluwatan sa usa ka tawo kinsa miani'g mga pagdayeg diha sa iyang determinasyon sa pagkab-ot sa usa ka pangandoy luyo sa estado sa iyang pagkatawo.
Ila-ilahon ta karon si Police Officer 1 Weltor Helborion, kinsa usa sa mga Children In Conflict with the Law (CICL) sa kapulisan sa iyang kabatan-onan, gumikan miyembro siya sa gikahadlukan nga gang niadto sa Barangay 23-C, Isla Verde, Boulevard, Davao City.
Maingong usa ka mga makakumot sa kasingkasing ang iyang suliranan gumikan luyo sa kinabuhing batang kalye, miyembro sa gang ug wa mipatuo sa pag-atiman sa mga ginikanan, siya naluwas sa Sta. Ana Police Station niadtong tuig 2002.
Sukad niadto, gialima siya sa mga pulis sa maong istasyon, maoy ginasugo, tiglimpyo sa mga kuwarto, tigpanilhig, tiglimpyo sa kasilyas ug usahay mao nay moluto sa mga pagkaon.
Gimaymayan, ug gipamata kaniya unsa ang maayong buhat.
Tuig 2007, migraduwar siya sa Sta. Ana National High School (SANHS) sa Davao City dala ang pangandoy nga unta ugma damlag mahimong usa ka opisyal sa kapulisan, nga sama sa iyang nakita sud sa presinto.
Sa tuig 2012, nahuman gyud niya ang kursong Bachelor of Science in Criminology (BS-Crim) sa Mats College of Technology sa Davao City diin iyang gipakita sa iyang mga ginikanan ang iyang kadasig ug determinasyon aron matubag ang mga damgo.
Nahimong student assistant (SA) sa MATS College ubos sa superbisyon sa iyang di malimtan nga boss nga maoy usa sa naghulma kung paunsa siya motindog sa koliheyo, Atty. Semporiano Alterado Sr.
Gisulod sab niya ang Chowking Seeds Scholar (CSS) aron mahatag sab kaniya og dugang tabang gawas sa mga tabang nga miabot gikan sa kapulisan kinsa nagtan-aw sa iyang dakong oportunidad nga mahimo gayung sama nila nga naka-uniporme.
Mipasar dayon sa board exam sa Criminology, dayon way duha-duhang gitabangan sa aspeto nga pinansiyal ug ubang mga materyal nga butang pinaagi ni Police Chief Inspector Liza Ramirez, kinsa maoy kasamtangan nga hepe sa Women and Childrens' Protection Desk (WCPD) sa Davao City Police Office.
Human niadto, misulod dayon isip striker sa kanhi hepe sa Police Regional Office (PRO) 11 nga si Police Senior Supt. Jaime H. Morente.
Giingon nga dinhi na nagsugod ang karera sa iyang kinabuhi sa tunhay na gayud sa pagsulod sa kalibutan sa kapulisan human siya mipailawom sa Basic Recruit Course (BRC) sa training center sa Regional Training School sa Mintal, Davao City.
Usa sab siya sa mipailawom sa PNP-Special Counter-Insurgency Operation Unit Training (PNP-SCOUT) [Class Alpha & Bravo] nga maoy usa sa mga nakakusi sa kasingkasing sa mga opisyal sa kapulisan atol sa ilang pag-graduwar sa PRO 11 Grandstand Camp Quintin M. Merecido, Buhangin District Davao City.
Gikan niadto, dayon siyang na-download sa Regional Public Safety Battalion (RPSB) 11 sud sa hapit duha ka tuig dayon gibalhin sa 3rd maneuver company.
Gibalhin dayon siya sa Jose Abad Santos Police Station sa Davao Occidental sud sa tulo ka bulan ug sa kasamtangan anaa na siya sa Panabo Police Station.
Gikan sa palabuy-laboy sa kalsada nga makahimo na lang og salaud, batang Isla Verde ug miyembro sa gikahadlukan nga Inosenting Demonyo Gang sa dapit, ug nahimo nang usa ka miyembro sa kapulisan pinaagi sa programa sa DCPO nga luwason ang mga susama niya og kahimtang.
Mga higala, ania ang atong pakighinabi sa atong bida:
SALUDO KAMI: Unsay mga kaagi sud sa istasyon sa pulis luyo sa imong hunahuna nga miyembro ka sa gang?
PO1 WELTOR HELBORION: Nag-eskuwela ko, ginagabayan ko sa mga pulis, hatag-hatagan ko'g tag P20, nagaluto ko sa ilaha, nagalimpyo ko sa istasyon, sugu-suguon, manilhig, tanan trabaho. Pero every naa ang enlightment sa akong kaugalingon gikan sa ilaha, maong hinay-hinay nga nausab ang batasan ug sundon ilang mga maayong gipamatuto diri nako.
SK: Dugay ba nimo naundang ug nabiyaan ang imong mga kaubanan sa gang?
PO1 HELBORION: Dugay-dugay pod, pero bago ko ni graduate sa high school nabiyaan na nako, kay nag-eskuwela ko diha man gyud ko mosandig sa mga pulis sa akong pagkaon, sa balon ug bisan sa mga biya nga sanina ginahatagan ko nila. Kung makita nako sila [kauban sa gang] nga mag marijuana, molikay gyud ko kay kabalo ko, pag-abot nako sa station naa gyud masuko.
SK: Nganong miabot sa punto nga didto ka sa mga gang naadto? Nganong misulod ka ato? Unsay mga hinungdan?
PO1 HELBORION: Product ko sa broken family maong naingon ato ko, pero bisan pa man niana, wa gyud ko nawad-an og paglaum diin usa sa akong dako nga mapasalamatan mao ang mga pulis nga nagpamatuto nako kung unsa ang maayo. Naningkamot gyud ko, aron mahatagan nako'g tubag ang pangandoy sa akong mama, bisan nagbulag sila ni papa, naa gyud ang pag-antus sa akong kinabuhi, naningkamot gyud ko.
SK: Unsay mensahe nimo sa mga kabatan-onan nga nagpadala sa walay kaseguraduhan nga nahimong CICL nga sama nimo niadto?
PO1 HELBORION: Di lang nila sayangan ang opportunity, always pray gyud kang God ug ubanan sa pagkugi, dapat love gyud nimo ang imong kaugalingon ug pirmi ingnan nga, kaya gyud ni nimo. Mosandig lang kang God kay siya ang nasayud kung asa ta niya ibutang, di magtinapulan, di mawad-an og paglaum kay ang tanan nga problema naay kasulbaran. Kung namali man kita karon, kahatagan nato'g second chance ang kaugalingon nga magbag-o kay di pa ulahi ang tanan. Hinumdoman nato nga kung gusto ta mo-eskuwela, maningkamot, kay moabot ra ang panahon nga naa gyud ihatag si God nga motabang nato.
Si PO1 Helborion maoy ikaduha sa upat ka magsuon, kinsa ang kamagulangan nila, iya nang napalitan og PUJ aron maoy ilang kakuhaan og panginahanglan sa ilang pamilya human masunog ang ilang balay tuig 2014. Samtang ang ikaduha nagtrabaho sa laudry shop ug ang kamanghuran kasamtangan nagtuon sa kursong BS-Customs Administration.
Niadtong November 7, 2015, gikasal sila sa iyang hinigugma nga si Klarisse Coronel-Helborion, magtutudlo sa Island Garden City of Samal (Igacos) sa Davao del Norte.
Napaambit sa atong bida nga di gyud magpawala sa paglaum luyo sa mga pagsulay. Kanimo, Police Officer (PO) 1 Weltor Helborion, saludo kami sa imong pagsalig sa kaugalingon!