KINSAY nag-ingon nga kon umentuhan na sa ilang suweldo ang kapulisan, mahunong na ang ilang mga binoang? Na-umentuhan na bitaw, apan naa man gihapon. Niadtong miaging adlaw, nadakpan si PO3 Ritchie Saquilabon sa iyang kaubang pulis sa counter-intelligence task force (CITF) atol sa entrapment operation. Si Saquilaban nga nadestino sa Parian Police Station, naaktuhan nga midawat sa kuwarta nga P20,000 gikan sa inahan ni Richie Labus, kinsa ilang nadakpan kabahin sa illegal nga drugas.
Si Gloria Labus mireklamo sa CITF human siya gipangayoan og kuwarta ni Saquilabon bugti sa pag-areglo sa kaso sa iyang anak. Nadakpan si Richie Labus sa grupo nila ni Saquilabon. Nag-operate sila nga walay pagtugot gikan sa ilang labaw unya wala pa gi-blotter ang kaso. Aduna siyay kuyog nga laing duha ka pulis ug barangay tanod sa maong illegal nga operasyon. Atol sa entrapment naka-ikyas ang iyang mga kauban.
Karon gihulipan ang tanang sakop sa Parian Police Station apil ang hepe nga si Chief Inspector Ramoncelio Saban. Sa dihang nadakpan ang usa ka sakop sa Carbon Police Station atol sa anti-drug operation sa Mabolo, gihulipan ang iyang hepe nga si Chief Inspector Jacinto Mandal ubos sa command responsibility.
So, wala pa gyud mahunong kining mga binaong nga susama niini sa atong kapulisan. Daghan gihapon diha nga nagbinoang bisan dako na og suweldo. Ang nagranggo og P03 tigdawatan og 30 mil kapin matag buwan. Ah, bisan man gani anang anti-drug operation, daghang mga binoang. Naa gihapon nga protection raket sa mga illegal nga pasugalan. Aw, kunsabagay, magbinoang man gani ang mga tag-as og ranggo, kana pang mga ultimo. Ang mga tag-as nga opisyal sama sa mga city, provincial ug regional directors maayo mo-oplan pakilala. Apan bisan pa sa mga binoang sa uban, dili gihapon kita angayan mawad-an og pagsalig sa atong kapulisan kay anaay daghan gihapon diha nga sinsero ug rehilyoso nga nagtamud sa ilang katungdanan. (bobbygnalzaro@gmail.com)