KADAGHANAN sa mga Pilipino, 94 porsento, niingon nga sila malipayon (very happy), sumala pa sa usa ka nasudnong survey nga gihimo sa Social Weather Stations (SWS) gikan sa Disyembre 8 ngadto sa 16 sa miaging tuig.
Ang gidaghanon sa mga Pilipino nga malipayon nisaka og kuwatro puntos gikan sa 90 porsento sa survey nga gihimo niadtong Septyembre 2017 ug tres puntos gikan sa 92 porsento sa Hunyo 1996.
Sa samang survey, 92 porsento sa mga Pilipino niingon nga nga sila natagbaw sa ilang kinabuhi (very satisfied). Nagpakita kini og umento nga kuwatro puntos sa 88 porsento nga natala niadtong Septyembre 2017 ug dos puntos sa 90 porsento sa Septyembre 2016.
u25cf ● ●
Apan ang survey wa magsulti kon unsay hinungdan nganong malipayon ang mga Pilipino. Hinuon makita nato nga dali da kaayong mopahiyom ang mga Pilipino. Dali ra sab kaayong makakita og estorya nga kataw-anan.
Ang kagul-anan ikatawa lang. Dihay tawo nga nangumusta sa iyang kumpare nga dugay na niyang wa igkita. Matod pa niya, “Nangitom man nang imo panit pre. Na-sunburn ka sa sigig kaligo sa dagat no?” Tubag sa iyang kumpare, “Di man ni sunburn pre, inborn man ni.”
Dihay ni-order og itlog para pamahaw sa usa ka restaurant apan sigi lang gilabay-labayan sa waitress. Sa katapusan giduol siya sa waitress ug niingon, “Unsaon nako imong itlog, Noy”? Tubag sa tawo nga nasuko na, “Kawta na lang akong itlog, Day.”
u25cf ● ●
Bisan ang kalisod ikomedya lang sa mga Pilipino. Usa ka estudyante nga gigutom nipauli sa ilang balay ug nangutana sa iyang inahan, “Unsay atong sud-an, Ma? Tubag sa inahan, “Tan-awa lang sa refrigerator, Dong.” “Wa man tay refrigerator, Ma,” tubag sa anak. “Aw, way sud-an,” matod pas inahan.
Wa pay pagtuon nga gihimo nganong malipayon ang mga Pilipino. Apan dunay niingon nga tungod tingali kini sa kaabunda sa kahayag ug kainit sa adlaw nga tuburan sa Vitamin D nga mopagawas sa happiness hormone nga serotonin. Basta magkapundok, mogawas dayon ang mga pasiaw. Labi nag dunay mga ilimnon sama sa Emperador ug San Miguel Beer.
Bisan unsay topic, naay mga pakatawa. Sama niadtong estorya sa usa ka tawong himatyon nga niingon sa iyang asawa, “Day, hapit na man gyud ko mamatay, tagai ko adtong lami kaayo nimong chocolate cake.” Tubag sa asawa, “Ayaw nag hilabti ha kay giandam ko na sa mobilar nimo.”