PAGKAMAKALOLOOY sa mga libud-suroy ug makililimos sa aseras ning alangisig nga dakbayan. Hulagway sa mga alaot ug kagutom sambol sa panan-aw sa mga bisita. Sa miaging tuig gipanghipos sa karaang ihawan aron walay sabod sa usa ka semana nga Asean Summit. Salikwaot nga kinaiya nga manglimpyo lamang og naay bisita. Nag-Santa Claus ang kagamhanan sa siyudad sa Sugbo gipakaon ang mga makililimos. Kon gipatuman palang ang Anti-Mendicancy Law (PD 1563) nga magsilot sa ginikanan nga wala magtagad sa mga anak wala untay makililimos o libod-suroy. Maong dili mabasol ang buhat sa kalooy.
Daghan ang nanglalin dinhi sa siyudad. Nagdasok ang mga squatters. Kay lisod ang trabaho maong midaghan ang makililimos. Misiaw ang mga badlongon ug ang uban nangapriso. Sumad karon 136 ang nasakit og Hiv/Aids sa Cebu City Jail (CCJ) diin 16 ang nangamatay ug 60 nasakit sa tuberculosis. Sa Cebu Provincial Detention and Rehabilitation Center (CPDRC) lima ang nasakit sa Hiv/Aids. Nahimo gihapong Santa Claus ang kagamhanan pinaagi sa pagdapat og tambal sa maong mga masakiton nga ilang nakuha mugna sa pagsawo sa dagom sa pag-inject og nubain ug ang kahugaw sa prisohan.
Niining naglakat nga mahal nga adlaw o kwaresma padulong sa semana santa o pasko sa kasakit maoy panahon sa pagpuasa ug pamalandong. Apan magpiyesta ang Santa Fe, isla sa Bantayan gawas sa ilang tinuig nga pangilin sa buwan sa Hunyo. Ang pagkaon og karne sa isla sa Bantayan gitugot ni Papa Leo VII sa 1853 hinoon gilibkas sa nagsunod nga Santo Papa apan wala mapapas kay naandan nga tradisyon. Sa miaging tuig mitumaw ang kasungian tali ni Santa Fe Mayor Jose Esgana ug Kura Paruko Roy Bucag sa Isla Music Festival. Wala man tingali law-ay sa musika kay dili man bikini open. Basin kaha nanagana si Fr. Bucag nga mominos ang mangapil sa kalihokan sa simbahan kay adto na sa kalingawan. Dunay nangagpas nga ang katigulangan ni Mayor Esgana misulod sa Iglesia Filipina Independente o Aglipayan. Apan bisan unsay relihiyon silang tanan nagdughit sa pagtulon-an ug kamatuoran. Dihay pasiaw sa pista nga ang tigbakay duol ra sa kapilya, pagmisa sa pari daghan ang nagsinggit og O Dies kaysa O Dios.
Marso 30, 12noon-3pm mao na ang matag tuig nga Siete Palabras sa BUNPI nga ipahigayon sa naandan nga Tanchan Celestial Garden sa Upper Goodsheperd Banawa Hills. Mabati sa DYRC ug makita sa facebook live. Salamat sa tanang mibulig sa relihiyosong kalihokan sa mga sakop sa Bunpi ubos nila ni Founder Ildefonso Ermitanio, Pres. Conrado Cumayas ug speakers nga lay ministers pinangulohan ni Bro. Butz Ruaya. (csa_1156@yahoo.com/0916-734-5737)