SEMANA Santa na ug sugdan nato karong adlawa sa Bendita sa Lukay.
Makita usab nato ang mga salida sa sinehan ug telebisyon bahin sa bibliya ug kinabuhi sa atong Ginoo.
Sama sa CCTN channel 47 nga bituonan sa atong mga paboritong Bisayang artista nga maghatud kanato og mga salida nga may mga leksyon sa kinabuhi.
Duha ka Lenten drama presentation nga dili nato sipyaton: si Joan Amores sa “Saka kanaug sa hagdanang gabok” ug silang Mildred Montesclaros Cabrera, Vicky Solis ug Tess Diez sa “Tulo ka putli”.
Base sa trailer pa lang, pang-best actress ang ilang gipakita. Pulos nindot, makapanaminan ug labaw sa tanan daghang makuhang pagtulon-an.
Grabe ka-intense ang pag-arti ni Joan Amores sa “Saka kanaug sa hagdanang gabok” nga gisuwat ug sa direksyon ni Tess Diez. Sa “Tulo ka putli” si Joan Amores usab ang director. Bravo Joan!
Gawas nilang Mildred, Vicky ug Tess makauban usab nila sa “Tulo ka putli” silang Star Lormil Cabrera de Gracia, Janice Gimena ug Jim Carba (batan-ong bersyon nilang Mildred, Vicky ug Tess) uban usab ni Dan Sy Lopez, Carl Ceniza ug daghan pa.
“Sala ba diay ang mahigugma” kon si Tess pay pasultion, nganong nakapamung man ini ang Tess, mao nay usa sa mga eksenang atong nuntan.
Kining duha ka Lenten drama presentation makita nato karong Miyerkules Santo, Huwebes Santo ug Sabado de Gloria sa CCTN47, ay’g saba!
Maghudyaka ang Jadine fans sa Sugbu kay sa dili pa ang dakong concert nila karong Mayo, makita una ninyo sila sa pelikulang “Never not love you” nga showing na karong March 31.
Ang “Never not love you” gi-shoot sa London, gikan sa Viva films ug sa direksyon ni Antoinette Jadaone, ay’g saba!
Adunay ikatulo nga casting call alang niadtong gustong makita sa usa ka Binisayang lilas sa direksyon ni Peach Caparas. Kaabag niya ang iyang amahan nga si Direktor Carlo J. Caparas.
Ang audition himuon karong Easter Sunday, Abril 1, 8 a.m.-6 p.m. sa Cebu Capitol Social Hall. Ang mga gikinahanglan: mga batang babaye (9 anyos), mga babaye ug lalaki (16-26 anyos) ug mga babaye ug lalaki (40-50 anyos). Taga ubang lalawigan makaapil sa casting call. Tawag lang kay Sam Costanilla cp number: 0932 277 8771, ay’g saba!
(Wenilyn Sabalo / USJ-R Intern)