10 ka mga tawo ‘nasilhig’ sa kapulisan sa CPPO

NAPULO ka mga tawo ang nasikop sa Oplan Silhig Pro­binsya nga gipangulohan sa Cebu Provincial Police Office kagahapon sa kaadlawon sa Tangke, siyudad sa Talisay.

Armado og mga search warrant ug warrant of arrest ang kapulisan, apan kasagaran sa ilang mga target wa nila masikop.

Ang mga nasikop mao silang Gloria Bazar, kinsa dunay alias warrant of arrest sa kaso sa illegal nga drugas, ug Leonil Brigondo, subject sa ilang search warrant.

Atol sa pag-abot sa kapin sa 100 ka mga pulis gikan sa nagkadaiyang police stations sa probinsya sa Sugbo, ilang naatlan ang walo nga nagsu­yop sa illegal nga drugas.

Ang mga naatlan mao silang Raymond Oca, Argie Mana­yon, Gilbert Luago Campo, Junlix Cabras Abrenica, Duane Paraiso, Redgie Barrientos ug Julyper Lapay, pulos taga Tangke, Siyudad sa Tali­say, kinsa pulos nakuhaan og mga pinakete sa illegal nga drugas sa ilang posisyon.

Matod ni Supt. Reyman Tolentin nga gihingusgan sa Police Regional Office 7 ang kampanya batok sa illegal nga drugas pinaagi sa Oplan Silhig Probinsya.

Sama sa gihimo sa siyudad sa Sugbo diin aduna silay Oplan Pokemon, mao usab ang himuon sa tibuok Central Visayas.

Giuna nila ang Barangay Tangke sanglit problema sukad pa kaniadto ang maong barangay sa illegal nga drugas sa tibuok probinsya sa Sugbo.

Ang mao nga dapit nailang komprahanan sa illegal drugs sa ubang dapit sa lalawigan.

Daghan nang suway nga pagsumpo sa illegal drugs sa dapit, apan pakyas.

“Okay man ang resulta. So, according to Provincial Director ato ni ipadayon ang Oplan Silhig Probinsya. Giuna nato ang Talisay kay daghan kaayo tag target ilabi na diha sa Tangke,” matod ni Tolentin.

Sunod semana, laing lugar na usab sa probinsya sa Sugbo ang rombuhon sa kapulisan, apan wa nila gibutyag kon asa.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph