DUHA ka mga kanhi sakop sa Criminal Investigation and Detection Group (CIDG) sa Davao Region ang nasikop human sa pagsilbi sa search warrant gumikan sa ilang pagpaninda og shabu.
Ang operasyon gilusad pinaagi sa Drug Enforcement Unit (DEU) sa Regional Special Operations Group (RSOG) sa Police Regional Office (PRO) 13 didto sa Purok 7-A, Brgy. Poblacion, Trento, Agusan del Sur alas 6:30 sa gabii niadtong Biyernes.
Mga suspek nailhang sila SPO2 Rosil Abenton Ellevera, 32, nadestino sa CIDG-11, residente sa Brgy. Toril Poblacion, Davao City ug si PO3 Gilbert Melgar Abapo, 44, ulitawo, nagpuyo sa Brgy. New Visayas, Panabo City.
Gilusad ang operasyon batok sa duha pinaagi sa search warrant No. 18-03 nga gipagula ni Hon. Judge Lou Nueva, Executive Judge, sa RTC Branch 54 gumikan sa impormasyon sa ilang kalambigitan sa pagpadagan sa ilegal nga druga sa dapit.
Mokabat sa P129,800.00 kantidad sa shabu ang nakumpiska sa mga dinakpan ingon man mga armas.
Gawas kanila nasikop sab ang duha ka mga babaye nga ilang kauban atol sa ronda.
Sumala ni CIDG-11 director Supt. Edilberto Leonardo nga nag-Awol (absent without official leave) si PO3 Adapo, samtang si SPO2 Ellevera nabalhin sa Autonomous Region in Muslim Mindanao (ARMM) human naapil sa listahan ni President Rodrigo Duterte niadtong 2016 nga nalambigit sa ilegal nga druga.
"Nag-awol yan si PO3 Abapo. Yan naman si SPO2 Ellevera na-reassign yan sa ARMM dahil nasali ang pangalan niya sa PRRD's list noong 2016, dati yan silang na-assigned sa CIDG-11, then after itong si SPO2 Ellevera wala na sa CIDG-11, sa Crame na ang record niya," ingon ni Leonardo.
Ang duha ka pulis uban sa duha ka mga babaye gibalhog na sa prisohan sa Trento, samtang gihikay na ang kaso nga ipasaka kanila didto sa korte.