DAKO ang pasalamat sa Police Regional Office (PRO) Davao Region ngadto sa katawhan labi na sa mga Dabawenyo sa pagsuporta sa Alveo Ironman 70.3 nga maoy hinungdan nga nahimo kining malampuson ug malinawon kagahapong adlawa.
Kini ang gibutyag ni PRO 11 spokesperson Chief Inspector Milgrace Cajez Driz human sa ilang malampuson nga pagbantay sa palibot nga gipangunahan ni PRO 11 director Chief Supt. Manuel Gaerlan.
"Successful ug generally peaceful ang event sa Alveo Ironman 70.3 tungod ni siya sa suporta sa katawhan kinsa misunod gayud sa mga gipatuman nga palisiya sa atong kapulisan diri sa Davao region," ingon ni Driz.
Dugang niini nga samtang nagpadayon ang programa duna say gihimo nga makuti nga monitoring ang kapulisan pinaagi sa kuha sa mga closed-circuit television (CCTV) sa buhatan sa Public Safety and Security Command Center (PSSCC).
Sabado pa sa gabii, naka-deploy na ang mga pulis palibot sa mga dapit nga agian sa mga atleta nga misalmot gikan Davao City padung Tagum City.
Duna say mga pulis nga nagbantay sa mga tourist spots nga sagad giadtoan sa mga atleta ug ang ilang mga gitulogan.
Mismong ang Regional Public Safety Battalion (RPSB) 11 ug ubang unit sa kapulisan sa Davao Region, kasundalohan, Philippine Coast Guard (PCG) 11, ug ang Task Force Davao maoy nagbantay sa palibot aron mapabilin ang pagpatunhay sa kalinaw sa dakbayan.
Anaa sab ang suporta sa lokal nga kagamhanan sa Davao, Panabo, Camen ug Tagum nga maoy usa sab sa mga hinungdan sa malampuson nga aktibidad.
Ang IronMan matigayon na sab sa Subic karong June, samtang sa bulan sa Agosto sa Cebu City.