Super Sine: Da best ang Fast & Furious 7

SUKAD gipagawas ang unang “The Fast and The Furious,” nahimo na kong fan sa mao nga franchise film. Tanan niini, gikan sa una nga pelikula niadtong 2001, hangtod sa Fast 6, akong gi­atangan. Kining mao nga franchise film malampuson kay matag sequel nag­kanindot, dunay bag-o, nagkagrabe ang action ug thrill.

Ang usa sa nakadugang sa akong excitement sa pagtan-aw sa Fast 7 mao ang kamatayon ni Paul Walker, nagdala sa papel ni Brian O’Conner, sa usa ka aksidente sa awto. Naikag ko sa pagtan-aw kon unsay buhaton sa director ug producer aron magpabiling buhi si Brian sa mao nga pelikula.

Bisan tuod kon alang nako mas dako og papel si Vin Diesel ( Dominic Torretto) ning 7th installment, mas makapaikag kon giunsa sa production staff nga mapadayon ang karakter ni Brian. Tuod man, bisan gigamit nga double niya ang iyang duha ka igsuong mga lalake, ingon sa naa lang gihapon si Brian, buhi sa pelikula.

Sugilanon

Ang estorya nagtuyok sa pagpanimawos ni Deckard Shaw nga gidala ni British action star Jason Statham kang Dominic. Nasuko si Shaw tungod sa nahita­bo sa iyang igsuon nga si Owen nga na-comatose human mahulog sa eroplano samtang nakig-away kang Dom sa Fast 6.

Human niya mapatay si Han sa Tokyo ug niduaw kang Owen sa ospital, niadto siya sa headquarter ni Luke Hobbs (Dwayne Johnson) sa Diplomatic Security Service sa Los Angeles. Nakuha niya ang file ni Dom ug sa iyang mga crew alang sa iyang pagpanimawos human sa away nila ni Hobbs. Nakaeskapo siya human mibuto ang bomba nga iyang gilabay kang Hobbs ug Elena Neves (Elsa Pataky).

Gipadad-an ni Shaw og package nga dunay bomba si Dominic nga hapit ikamatay nila ni Brian ug sa iyang pamilya. Sa pagduaw ni Dom kang Hobbs sa ospital, didto na niya nahibaw-an kinsa ang ilang gikaaway.

Sa lubong ni Hans sa Los Angeles, nitan-aw si Shaw sakay sa usa ka race car apan nabantayan siya ni Dom. Nahitabo ginukdanay sa duha ug sa unang higa­yon nagkaatubangay human sa binanggaay sa ilang tagsa ka awto.

Nikalit pagtumaw si Frank Petty (Kurt Russel) ug ang iyang mga sakop dihang pusilon na unta ni Shaw si Dom. Nakaeskapo si Shaw ug nagkaila sila si Petty ug Dom. Si Petty nisaad kang Dom nga tabangan siya sa pagpangita kang Shaw basta ilang maluwas si Ramsey kay hulga kini sa seguridad sa Amerika.

Ila lang makit-an si Shaw kon makuha nila ang usa ka program nga gitawag og God’s Eye, nga gigama ni Ramsey (Nathalie Emmanuel). Apan gikinahanglan nilang pangitaon ug luwason si Ramsey aron di mahiadto kang Mose Jakande (Djimon Hounsou).

Dinhi nagsugod ang grabeng aksyon gikan sa paglayat sa eroplano sakay sa ilang mga awto, ginukdanay ug binanggaay sa mga sakyanan. Pagpadulhog sa mga sakyanan sa bakilid kaayo ug pagpaambak sa lawom nga mga pangpang.

Naa usab ang pagpaambak sa race car sa tulo ka mga tower sa Abu Dhabi, ginukdanay ug inambakay sa mga sakyanan nga kusog ang dagan.

Action kaayo

Ang nakaanindot sa pelikula mao ang iyang action sequences nga usahay makapanga-nga ug mopahunong sa imong ginhawa. Gilamaslamasan pa kini sa hinanggaw nga mga estorya nilang Roman Pearce (Tyrese Gibson) ug Tej Parker (Chris Bridges).

Dinhi ning mao nga pelikula, angayan si Statham sa iyang papel nga kontrabida nga way kasingkasing ug kaluoy. Katuohan usab nga di siya sayonsayon nga mapilde sa mga away nila ni Hobbs ug Dom kay gawas nga maayo siya sa pangamot, igo-igo usab ang iyang gidak-on.

Bisan tuod medyo dunay bahin nga sexist ang pelikula, giluwas usab kini nila ni Ronda Rousey ug Michelle Rodriguez nga mipakita sa ilang kaisog ug abilidad sa hand-to-hand combat ug sa kabrayt ni Nathalie Emmanuel sa computer.

Sobra sa katunga sa pelikula tugob sa aksyon. Kon ikaw mahiligon sa action films, di ka magmahay sa Fast 7. Apan kon duna pay Fast 8, wa nay apil si Brian sa estorya nga gipaagi sa pasumbingay sa katapusan nilang pag-drive ni Dom, diin sa ending nagbuwag sila og dalan.

Maanindot nga ending kay ingon sa ilang giparetire si Brian, inay patyon sa salida.