NAGTUO si Tuburan Mayor Aljun Diamante nga ang pederalismo maoy kawsa nga makapahiusa sa mga lain-laing grupo nga nagsuporta kang Presidente Rodrigo Duterte.
Gipamahayag kini ni Diamante atol sa paglusad sa Cebuano Movement for Federalism (CemFed) sa 3rd, 4th ug 7th district sa Lalawigan sa Sugbo didto mismo sa lungsod sa Tuburan.
Si Diamante usa sa mga lider sa CemFed nga gipangulohan ni Mayor Mary Therese Sitoy-Cho sa Cordova.
Kuyog nila si Mayor Ronald Cesante sa Dalaguete, nga bise presidente sa CemFed. Ubang mga mayor nga didto sa maong kalihokan mao silang Jose Esgana sa Sta. Fe, Carmencita Lumain sa Badian, Beatriz Caburnay sa Alcantara, Rene Asentista sa Dumanjug.
Nagkanayon si Diamante nga kining maong kawsa angayang suportahan sa lain-laing mga opisyal sa kagamhanan ug mga grupo nga nagsuporta kang Presidente Duterte aron makab-ot ang kausaban.
Gawas sa national chairman sa National Movement for Federalism (NamFed) ug MMDA chief Danilo Lim, special guest usab sa maong kalihokan ang usa sa sinaligan sa Hugpong Ng Pagbabago nga si Konsehal Danny Dayanghirang sa Syudad sa Davao.
Gamayng background lang. Kini si Dayanghirang, nga uban sab kang Konsehal Small Abellera nga dinapit didto sa Tuburan, mga dakong lider ni Mayor Sara Duterte sa Davao ug kamaguwangan nga anak ni Presidente Duterte.
Alang kang Diamante, nagpakita lang kini nga ang CemFed suportado sa lain-laing mga grupo nga nagsuporta sa presidente.
Danao
Malaumon si Diamante nga madayon ang paglusad sa CemFed diha sa Syudad sa Danao pipila ka semana puhon. Nag-agad lang kini sa panahon nga makalugar si kanhi senador Nene Pimentel isip usa sa mga speaker.
Pinaagi sa federalism, nagtuo si Diamante ug mga mayor nga sakop sa CemFed nga mao kiniy makatabang kanila nga mapalambo pa ang ilang tagsatagsa ka mga local nga kagamhanan.
Barangay
Gituohan na nga karong nga posibleng madungan na sa piliay sa Mayo 2019 ang plebisito alang sa bag-ong batakang balaod nga mag-usab sa atong porma sa kagamhanan.
Kini ang gituohan ni Konsehal Dayanghirang dihang siya nakihinabi sa mga sakop sa media nga ni-cover sa maong kalihokan.
Tungod niini, malaumon ang mga opisyal nga mas mapasabot pa sa katawhan ang pederalismoi kay di na man kini ahaton nga dungan sa piliay sa barangay.
Lim
Sakto lang nga apilon sa paghangyo ang National Bureau of Investigation (NBI) sa pagsusi niadtong pagbanhig kang Welinggton Lim, ang igsuon ni Peter Lim. Kini mahinungdanon aron matugkad dayon ang kamatuoran sa maong ambush.
(@anol_cebu sa Twitter)