NUNOT sa nahitabong pagsuway pagkutlo sa kinabuni ni magpapatigayon Wellington Lim, nagkurog na karon ang tibuok nga banay’ng Lim sa kahadlok. Si Wellington, kinsa manghod sa magpapatigayon ug gidudahan nga druglord Peter Lim, gi-ambush niadtong Biyernes sa tungang gabii samtang mobiya na unta kini gikan sa ilang patigayon nga bar, Infinity KTV and Music nga nahimutang sa Archbishop Reyes Avenue.
Wala maunsa si Lim kay wala makahalos ang mga bala gikan sa M-16 ug 9 mm pistol gumikan kay bullet proof ang iyang sakyanan nga Ford Expedition. Nakapadagan pa kini paingon sa IT Park diin siya magpuyo sa usa ka condominium. Patay ang usa ka security guard samtang laing guwardiya ug duha ka German nationals ang naangol sa pagpamanhig.
Walay labot si Wellington sa gihinganlan ni Presidente Duterte nga nahilambigit sa negosyo sa illegal drugs. Ang iya lamang maguwang nga si Peter Lim. Apan naapil siya kaniadto sa imbestigasyon sa House committee on illegal drugs nga gipanguluhan ni kanhi kongresman Antonio Cuenco. Kini human gibutyag sa ilang mga sinaligan nga sila si Ananias Dy ug Bernard Liu ang ilang kalambigitan sa illegal drugs. Sila si Dy ug Liu namatay sa misteryosong sirkumstansiya.
Karon, kinsa man kaha ang responsable sa pagsuway pagkutlo sa kinabuhi ni Wellington? Siya ba gyud kaha ang target o nasaypan o naa-an lang? Dili man siya druglord ug nganong apilon man siya? Kon si Peter ang pangutan-on, mga awtoridad ang responsable niadto gumikan sa mga armas nga gigamit. Talagsa ra nga mga sibilyan ang gitugutan nga legal nga makahupot sa maong matang sa armas. Kining maong pagduda posible usab.
Ang pag-ambush ni Wellington posible kaha usab nga mensahe niadtong mga gidudahan nga druglord ug sa ilang mga kabanay? Ang asawa sa giilang druglord didto sa Iloilo nga si Odicta, gi-apil sa pagpatay. Ang mga Parojinog sa Ozamiz City halos gihurot sa pagpatay. Karon, nagpangurog na siguro ang mga Lim gumikan ning maong hitabo. Lisod ning magpuyo ta sa kahadlok bisan naa tay kuwarta. Maayo pa tang pobre basta gawasnon lang. (bobbygnalzaro@gmail.com)