BISAN duna na siyay stable nga trabaho sa edad nga 26 anyos, iyang nasinati nga dunay kuwang, kahaw-ang sa iyang kaugalingon.
Mao ni ang hinungdan nga siya nilangyaw sa laing nasod aron adto manimpalad.
Didto, iyang naangkon ang tanan niyang gipangita: maayong trabaho ug income ug labaw sa tanan, ang tiunay nga gugma.
Si Marbeth Semprun, gradwado sa Bachelor of Science in Business Administration major in banking and finance sa Southwestern University (SWU), nakahukom nga moadto sa New Zealand niadtong 1984.
Matod pa niya nga daw nawagtangan na siya og gana sa Pilipinas bisan kon aduna na siyay trabaho isip accounting clerk sa Mandaue kaniadto.
Iyang giasoy nga aduna siyay nakahibalag kaniadto nga ambungan nga mga lalaki, apan wa sila magkadayon kay aduna say lain nga giiring-iringan.
“Nakaingon ko nga dili ko ganahan magminyo og Filipino kay bisan tuod og gwapo pero dili ra man imoha. Murag daghan kog frustration. Mao nga I decided to go overseas and meet somebody there,” asoy ni Marbeth.
Niadto siya sa Auckland sa New Zealand ug didto iyang nahimamat pinaagi sa iyang mga higala ang iyang bana karon nga si Patrick Fuley, usa ka retired police officer ug contractor.
“When I reached 26, I said to myself, this is not the life I wanna be. I started to think of going overseas. Para nako there was something lucking in my life,” paghulagway niya.
Giasoy ni Marbeth nga ang iyang pag-abroad mao ang pagpangita og trabaho.
Paglabay sa pipila ka buwan, nakasulod siya og trabaho isip mortgage broker nga nilungtad og kapin sa usa ka tuig.
Nakatrabaho usab siya sa usa ka insurance company sulod sa taas taas nga katuigan hangtod nga nibalhin siya og panerbisyo sa usa ka mall, ikatulo nga labing dako sa New Zealand.
Didto na sab siya neritero sa pagpanarbaho.
Sulod sa 34 niya katuig nga pagtrabaho sa mao nga nasod, hinayhinay nga nakapalit sila og mga apartment ug laing four-storey apartment sa barangay Sambag 1 dinhi sa Sugbo.
Ang iyang duha ka igsuong mga babaye nakaadto ug nakatrabaho usab sa New Zealand sanglit usa na siya ka Kiwi citizen.
Gipadayag ni Marbeth, kon wa siya nakahukom nga mobiya sa nasod niadtong tunga-tunga sa dekada 80, di niya maangkon ang kinabuhi nga anaa niya karon.
Sa kasamtangan, ang magtiayong Fuley nagdumala na sa ilang kaugalingong multi-million facility sa Barangay Luyang sa lungsod sa Carmen nga gitawag og Marick Beach Resort nga gisugdan na og hugop sa lokal ug langyaw nga mga turista.