WA pa mahuman ang binirahay tali ni Cebu City Mayor Tomas Osmeña ug Justice Secretary Vitaliano Aguirre gumikan sa mga gipakanaog nga desisyon sa Department of Justice (DOJ).
Kagahapon, si Aguirre nipasangil kang Osmeña nga nalambigit sa drug trade ug usa ka drug protector diin iyang gibutyag nga adunay siyay mga affidavit sa mga witness nga nagtudlo ni Osmeña.
Ang gipasabot ni Aguirre, matod pa sa iyang text message, mao ang giluwatan nga affidavit ni Reynaldo “Jumbo” Diaz.
Si Jumbo ig-agaw ug gidudahang bagman ni gipatay nga gituohang drug lord nga si Jeffrey “Jaguar” Diaz niadtong 2016. Matod ni Aguirre, si Jumbo gipaubos sa Witness Protection Program (WPP).
Base sa maong affidavit, si Osmeña nagdawatan og payola gikan sa maong sindikato.
Apan si Osmeña wa mahulga sa labing uwahing pulong nga giluwatan ni Aguirre. Matod sa mayor, ipadayon niya ang iyang akusasyon batok ni Aguirre nga igo lang nag-divert sa kontrobersiya sa iyang buhatan.
Matod ni Osmeña, dili siya maoy nagpakawaysala sa grupo ni Peter Lim, Kerwin Espinosa, Peter Co ug laing 18 ka mga gidudahang drug lord kon dili si Aguirre.
“Go ahead. I was the one who released Peter Lim, ako ang nahimong drug protector?” resbak ni Osmeña.
Kagahapon, gitagaan ni Aguirre og permiso ang pagpagawas sa statement ni Diaz aron sa pag-awhag sa ubang mga witness nga mopatim-aw ug mopamatuod sa maong impormasyon.
Sa dihang gipangutana kon nganong karon lang gipagawas ang impormasyon, igo lang mitubag si Aguirre nga tungod sa pagproseso sa pagpalig-on sa kaso.
Apan matod ni Osmeña nga bisan kon tinuod pa nga siya usa ka drug protector, dili gihapon kini makapa-abswelto ni Aguirre sa mga palpak sa iyang buhatan.
“Okay let’s say it’s true. Does it mean he is not guilty? Is that the way you’re going to defend yourself? ‘I’m innocent because Mayor Tomas Osmeña is a drug protector.’ Yabag kaayo siya uy. Don’t mislead the public. Answer the charge,” matod ni Osmeña.
Nagplano si Osmeña sa pagpasaka og kasong disbarment ni Aguirre sanglit matod pa niya nga naghatag lang si Aguirre og mantsa sa administrasyon ni Presidente Rodrigo Duterte.
Sa text message, si Aguirre nangkanayon nga si Diaz niluwat og affidavit niadtong Nobiyembre 23, 2016 ug nipasangil nga ang mayor sa dakbayan sa Sugbo nidawat og P2 milyones alang sa gastuhan sa ospital ug laing P5 milyones niadtong piniliay sa 2016.
Laing nalista sa payola mao sila si General Vicente Loot, mayor sa Daanbantayan, Cebu ug laing upat ka mga pulis nga wa nganli ni Aguirre.
Si Diaz kinsa nasikop sa Sorsogon niadtong Septiyembre 2016 anaa ubos sa witness protection program sa DOJ.
Sa pagkasikop ni Diaz, nahibaw na siyang daghang mga pulis ang anaa sa payroll sa iyang ig-agaw apan wa nahisguti ang pangan ni Osmeña niini.
Wa nalakip sa listahan ni Presidente Duterte si Osmeña nga usa sa mga narcopolitician.
Nisimpatiya si kanhi mayor Michael Rama ngadto ni Osmeña. Si Rama, sa iyang Facebook post, nibutyag nga maayo ang pasangil ngadto ni Osmeña kay makapanalipod pa siya sa iyang kaugalingon sukwahi sa iyang gidangatan nga gipasanginlan siya ni Duterte nga iyang gihulagway nga way basehan gumikan sa kakuwang sa ebidensya apan nadaot na ang iyang reputasyon.
Si Diaz maoy ikaduha sa Top 10 High Value Target sa rehiyon sunod ni Franz Sabalones kinsa nitahan.
Siya unta ang mopuli ni Jaguar sa iligal nga drug network niini human sa kamatayon niini human sa shootout tali sa kapulisan sa Las Piñas City, Metro Manila niadtong Hunyo 2016. Gihimakak kini ni Diaz. (PAC, JPP, SunStar Philippines)