Roldan: Kinabuhi luyo sa kamatayon
SEMANA Santa na. Panahon nga gigahin sa mga Kristiyano aron mahinumdoman ang pasyon sa Manunubos alang sa kaluwasan sa katawhan.
Nagsugod ang Semana Santa sa pagbendita sa lukay o Palm Sunday diin gigamit sa mga Israelita ang lukay ug ubang dahon sa tanum aron pagdawat ni Jesus sa iyang pagsulod sa Jerusalem.
Gihandom nato ang kasakitan, kamatayon ug pagkabanhaw ni Jesus nga mao usab ang pundasyon sa pagtuo natong mga Kristiyanos.
Mao nga ang tinuod nga Kristiyano dili magpadala sa problema ug uban pang gumunhap sa ilang kinabuhi.
Dili sila mawad-an og paglaum luyo sa kasakitan sama sa mga biktima sa Bagyong Yolanda sa Tacloban ug sa giyera sa Marawi tungod kay kahibalo sila nga luyo sa pagbangutan mao ang kalipay nga hilabihan. Mao kini ang kinasang-an nga mensahe sa kuaresma.
Nakita ko kini sa lima ka anak sa akong higala ug classmate sa High School nga si Wennie Loquinario Saragena nga sila si Jade Francis, Mark Adrian, Lord Windon, Bernard Brian ug Angelo Gabriel. Silang tanan nahimutang na usab ug nagmalampuson sa ilang kinabuhi.
Human sa pipila ka semana sa hospital, namatay siya tungod sa sakit nga acute leukemia. Gipanganak siya niadtong Marso 5, 1961 ug naminyo kang “Dodong Sintay” Saragena nga namatay usab niadtong 2012.
Nahimong Cocofed scholar si Wennie ug nikuha sa kursong Chemical Engineering sa Ateneo de Davao University ug nitrabaho isip Vocational Instruction Supervisor sa Tesda sa Camilo de los Cientos Technical School sa Padada, Davao del Sur.
Sa niaging mga semana gibalik sab sa sabakan sa atong Amahan sila si Totoy Maranan, Nang Baby Daclison, Delia Besinga-Caminero, Suzette Banuelos-Magallanes, Estong Jera ug pipila pa ka mga suod usab nako.
Sa pagkatinuod, dili sayon nga mawad-an kita sa atong mahal sa kinabuhi. Dali ra istoryahan apan lisud maka-move-on kung motidlom na ang ilang pagkawala.
Busa gikinahanglan nga tabangan, sabton ug agakon nato ang mga nagbangutan tungod kay luyo sa kamatayon, adunay kinabuhi nga walay pagkatapos. Ato silang iapil sa atong mga pag-ampo karong panahona kay nahiapil na sila sa atong tagsa-tagsa ka kinabuhi.
Unta may mag-ampo usab kanato kung moabot na ang atong panahon kay bisan unsaon nato'g likay moabot gayud kita sa salupan.
Sa laing bahin, nagsaulog sa iyang ika-58 nga adlaw'ng natawhan karong adlawa si Sandy Golimlim Tan.
Gitawag namo siya kaniadto nga “Payatot” ug masakiton apan karon mora na'g si anhing Marcial nga tag-iya og restaurant sa palengke.
Lamian ang pagkaon ang iyang giandam niadtong Dominggo sa ilang panimalay sa Padada samtang karong adlawa didto na usab sulod sa Sandrock Compound sa Calinan.
Didto ang iyang mga suod nga higala nga sila si Mayflower, Elvira, Raymie, Tata ug uban pa.
Naa pay banda nga nitugtog sa iyang party ug nag-hire pa'g Dance Instructor si Kerby aron tun-an ang mga nitambong.
Wa pod nagpalupig ang Davao Group nga sila si Dodong, Ronron, Boyet, Roland, Jovenil ug iyang mga brod sa Mason nga gabii nang niabot. Malipayong pagsaulog bay ug hinay-hinay lang sa kaon ug inom kay lawas ray atong kapital.