PARA nako nakaguba kini sa pangalan ni Cebu City Mayor Tomas Osmeña ang gibulgar ni Justice Secretary Vetaliano Aguirre nga siya drug protector.
Dunay gibug-aton ang pasangil ni Aguirre, kay adunay mitestigo batok sa mayor nga anaa karon sa Witness Protection Program (WPD).
Si Reynaldo “ Jumbo “ Diaz, ang bagman ug ig-agaw ni Jeffrey “Jaguar” Diaz, maoy mitestigo batok ni Osmeña, nga nakadawat og P7 million nga drug money.
Si Jaguar maoy notadong drug lord sa siyudad sa Sugbo nga napatay sa kapulisan atol sa gihimong manhunt operation didto sa Manila.
Ug ang nakapatay kang Jaguar, mga opisyal sa kapulisan sa siyudad nga giingong mga tawo sab sa mayor ug naapil sa kontrobersya ug gilabay sa Mindanao sa administrasyon ni Duterte, tungod sa kalambigitan sa drugas.
Diamante isip Bise Gob?
Human gipahibawo ni Bise Gobernador Agnes Magpale, sa dili na pagdagan sa samang katungdanan alang sa umaabot nga 2019 midterm election daghang mitumaw ang mga pangan nga angayang modagan.
Gani si Gobernador Hilario Davide III nipadayag sa kaanugon ug girespito ang hukom sa kugihan, ligdong ug competent nga bise gobernador.
Ug wa pa sab mohingan si Davide sa mohulip ni Magpale. Apan giingon nga mangita og sama sa abilidad ni Magpale.
Samtang mipasumbingay na si kanhi Gobernador ug karon Kongresista Gwen Garcia sa pagbalik sa Kapitolyo.
Wa pa sab motabi si Garcia sa posibli niining mahimong ka runningnate. Nanggawas ang pipila ka mga pangan.
Sa usa ka tapoktapok sa pagbinayloay og panahom sa isyu sa pulitika mtiumaw ang pangan ni Tuburan Mayor Aljon Diamante nga usa sa mga lig-on ug maayong material alang sa pagka bise gobernador.
Wa man tuod maapil sa listahan sa kampo ni Garcia si Diamante apan ilang nakita nga mas bug-at kini kandidato.
Matod pa sa akong tinubdan mas bug-at si Diamante kay dunay maayong liderato.
Duha ka higayon nga napili sa pagka presidente sa Liga sa mga mayor sa Sugbo nga way mibarog nga kontra.
Ug nahiusa ni Diamante ang mga mayor sa kalungsoran bisan pa man managlahi ang partido niini sa pulitka.
Di sama kaniadto atol sa election kon si kinsa ang mahimong presidente sa mayor miagi og gubot ug binayranay.
(Email: efrenlonzon77@gmail.com Text 09427930111)