Mongaya: Motuo pa ta ni Aguirre?

HUMAN nga wa na magkadimao ang kaso sa administrasyong Duterte batok sa negusyanteng Peter Lim ug Kerwin Espinosa dayon gihimong testigo ang mastermind sa pork barrel scam nga si Janet Napoles, motuo pa diay ta niining Justice Secretary Vitaliano Aguirre?

Una, nakalitan kitang gi-dismiss ang kaso batok ni Lim, Espinosa ug kining si Peter Co. Nahangangha kita kay kulang diay kuno sila og ebidensya.

Sigi na lang kini si Peter Lim kay duna man gyuy problema ang testimonya sa usa ka testigo batok kaniya. Wa sab gyuy laing testigo nga nakuha ang Department of Justice (DOJ) batok kaniya.

Apan nakita man gud nato ang pagkumpisal ni Kerwin diha mismo sa Senate investigation nga gisibya live sa telebisyon. Unya, kining Co, konbiktado na ug dugay nang nabalhog sa Bilibid.

Human niini, kalit nga nahimong state witness ang Napoles.

Ikaduha, atong nabasa kining sulat ni Atty. Clarence Paul Oaminal, usa ka kanhi opisyal sa Dangerous Drugs Board (DDB) ngadto sa Sun.Star Cebu.

Matod ni Oaminal, dunay tulo ka mga rason nganong kini si Aguirre dili angay tuohan ni Presidente Rodrigo Duterte ug sa katawhang Pilipino.

1. Wala niya gi-repeal ang usa ka mando ni kanhi justice secretary Leila de Lima nga nagmando sa pagbuhi sa mga druglord nga nag-atubang og mga kaso. Gigamit kini sa pagpangwarta sa miaging administrasyon.
2. Padayon ang pag-kontrolar sa industriya sa gidiling drugas sa mga druglord nga naa karon sa Bilibid.
3. Nagkadaghan karon ang pag-dismiss og mga kasong gipangsang-at batok sa mga druglord.