GISAULOG karon sa Kalibutang Kristohanon ang Pasko sa Pagkabanhaw kon Easter Sunday. Pagtimaan kini sa mga Kristiyano sa pagkabanhaw ni Hesu Kristo human sa tulo ka adlaw niyang pagkamatay human gilansang sa mga Hudeyo sa krus. Si Hesus maoy mitubos sa atong mga sala. Human sa iyang pagpakita sa iyang mga Apostoles, mipahangno sila kanila nga mopakatap sa tibuok kalibutan sa iyang nahimo kay mobalik na siya sa kiliran sa iyang Amahan.
Ning modernong panahon, nagkalain-laing selebrasyon ang ipahigayon. Ang ubang mga dagkong parokya mopahigayon og ‘sugat’. Ang pinaka-popular nga ‘sugat’ mao kanang sa lungsod sa Minglanilla nga ila usab nga gihimong festival nga gitawag og Kabanhawan Festival. Kabanhawan gikan sa termino nga ‘Pagkabanhaw’. Gawas kalihukan nga Sugat kaganihang sayo sa kaadlawon, adunay ipahigayon nga street dancing karong hapon. Mosamot gyud ang traffic diha gumikan kay sirad-an man ang national highway. Mag-traffic man gani kon walay kalihukan, unsa na gyud kaha kon sirad-an ang mga kalsada.
Ang sa lungsod sa Argao ug ingon man sa barangay Guadalupe ning dakbayan sa Sugbo, dagsaanan usab og mga tawo. Ambot kon ang akong higala pa ba nga si Pareng Rolando Jr., ang midirihir maong kalihukan diha sa Guadalupe. Hinuon, kining mga ingon niining kalihukan gihimo man usab nga panguwarta sa uban sama god pod sa Siete Palabras nga gipanapi sa mga nag-produce sama sa taga radyo.
Ang mga shopping malls daghan usab og gimik sama aning Easter egg hunt nga makalingaw sa kabataan. Apan ang kadaghanan karon adto gyud pa-ingon sa beach resorts aron magsaulog ning maong okasyon. Lipay-lipay og bonding uban sa mga sakop sa pamilya ug mga higala. Puno-puno ang beach resorts karon.
Ang mga leaders sa simbahan mo-ingon nga ang pag-obserbar sa Semana Santa di panahon sa tingbakasyon apan panahon sa reflection kon pagpamalandong. Hipokrito ra usab kita nga dili mobakasyon og magsigi lang og sunod sa kalihukan sa simbahan.
Happy Easter Sunday sa tanan.
(bobbygnalzaro@gmail.com)