WAY puasa ang kapulisan sa pagpanglimpyo niining ilegal nga drugas sa Sugbo, niadto lang Miyerkules hangtod Biyernes Santo dihang nakasakmit kini og kapin P8 milyones nga kantidad sa shabu sa managlahing mga operasyon sa dakbayan sa Sugbo.
Tinun-an sa kursong Customs ang nasikop niadtong Miyerkules sa gabii diin nakuhaan kini og dul-an P3 milyones nga shabu.
Ang nasikop giila nga si Orpheus Edorne Pangilinan, 26, estudyante, residente sa Sitio Romblon, Barangay Inayawan.
Nakuha gikan kang Pangilinan ang nagkadaiyang pakete sa shabu nga aduna’y gibug-aton nga 240 gramos o P2.8 milyones base na usab sa Dangerous Drugs Board (DDB) Value.
Sa Barangay Tisa, tulo ang nasikop sa operasyon luyo mismo sa Tisa Public Market ug sa Purok Pag-iisa III.
Pasado ala 1:00 sa hapon niadtong Huwebes Santo dihang nadakpan sila si Arnolfo Airland Diola, 24, ug si Jhon Paulo Peña, 22, luyo sa Tisa Public Market.
Nakuhaan kini og 35 gramos nga shabu nga nagkatidad og P413,000.
Samtang nasikop usab si Ryan Atillo, 37, residente sa Purok Pag-iisa.
Nasakmit gikan niini ang 15 gramos nga shabu nga nagkantidad og P177,000.
Biyernes Santo sa udto dihang nasikop sa kapulisan usab sa Cebu City Police Office si Mario de Jesus, 34, security guard atol sa buy-bust operation sa Sitio Red Rads, Barangay Basak San Nicolas.
Usa ka kilo sa shabu ang giingon nga nasakmit gikan niini nga nagkantidad og kapin P4 milyones.
Samtang alas 5 sa hapon sa susamang adlaw dihang nasikop usa dan A. Lopez, Barangay Labangon si Loremar Carcueva, 37, ug si Mark Bryan Lopez, 34, kinsa nakuhaan og 25 gramos nga shabu nga nagkantidad og P295,000.
Sa Sitio Puntod, Alaska Barangay Mambaling nakuhaan usab og 13 gramos nga shabu sila si Marceki Silverio, 25, ug ang asawa niini nga si Yolanda, 49.
Nagkantidad og P153,000 ang nasakmit nga shabu.