INGON sa madayon na gyud ang eleksyon sa barangay ug sa Sangguaning Kabataan (SK) karong Mayo 14. Samtang gustong i-oktaba sa House of Representatives ang maong mga eleksyon, way balaudnong giduso didto Senado.
Kon madayon ang eleksyon sa barangay ug sa SK, molihok kaha ang narcopolitics nga matod pa ni Presidente Rodrigo Duterete nagpaluyo sa mokabat sa 5,000 ka mga opisyales?
Mao kini ang hinungdan nga niingon siya nga ang Pilipinas usa na ka narco-politics state. Kay matod pa sa Presidente, dunay mga barangay kapitan nga nahilambigit sa illegal nga drugas. Tungod niini, na-oktaba nag kaduha ang piniliay sa barangay ug sa SK.
***
Apan ang wa maklaro ang termino nga usa ka drug protector. Maoy naandan nga ang mga politiko, lakip na sa mga kandidato sa barangay kapitan, nga mangandam og pundo alang sa eleksyon, pinaagi sa campaign contribution.
Kon modawat silag amot gikan sa usa ka suspetsadong drug lord, matawag ba silang mga drug protector? Asa man kutob ang ilang gahom sa pagprotehir sa illegal nga drugas?
Dinhi sa syudad sa Sugbo, labing menos duha ka mga dagkong politiko gitawag nga mga drug protector. Nag-una si kanhi Cebu City mayor Mike Rama nga naapil sa listahan sa Presidente. Ning bag-o lang, ginganlan ni Justice Secretary Vitaliano Aguirre II si Cebu City Mayor Tomas Osmeña nga usa usab ka drug protector.
***
Ang kang Rama nagsukad sa listahan nga gisumitir ngadto sa Presidente. Ang kang Osmena gibasi ni Aguirre sa Nobyembre 23, 2016 nga affidavit ni Reynaldo “Jumbo” Diaz, ig-agaw ug matod pa bagman ni Jeffrey “Jaguar” Diaz, usa ka suspetsadong drug lord.
Si Jaguar napatay sa pakigpinusilay sa mga pulis didto sa syudad sa Las Pinas, Metro Manaila niadtong Hunyo 2016. Ubos sa maong affidavit, si Osmena giingon nga nakadawat og balig P7 milyunes - P2 million alang sa hospitalization expenses sa 2013 ug P5 milyunes sa eleksyon sa 2016. Gihimakak kini ni Osmena.
Apan igo na ba ang maong affidavit ni Jumbo sa pag-ila kang Osmena nga usa ka drug protector? Giunsa man ni Osmena pagprotehir si Jaguar?