KAPIN sa 25,000 ka lainlaing klase sa mga libro ang mabasa sa Cebu City Public Library (CCPL), may kabahin sa kasaysayan sa Pilipinas labi na sa Sugbo, adunay alang sa reference nga magamit sa pagtuon sa mga estudyante, ug adunay alang sa mga bata.
Sa estante sa mga libro sa Rizaliana, duol sa opisina sa City Librarian, makita ang sinuwat nga mga libro ug compilation sa mga balak sa usa sa nasudnong mga bayani sa Pilipinas, si Jose Protasio Rizal.
Dinhi mabasahan ang mga libro nga Noli Me Tangere ug El Filibusterismo nga gihubad sa pinulongang Sinugboanon.
Ang nabantog nga magsusulat sa pinulongang Binisayang-Sinugboanon nga si Vicente Padriega, nailhan usab nga Virgo Potens, ang naghubad sa El Filibusterismo ngadto sa Sinugboanon.
Aduna kini unom ka mga kopya sa libro nga napatik niadtong 1963.
Moabot sa 39 ka mga kapitulo ang hinubad nga El Filibusterismo nga Sinugboanon ug 374 ang mga panid.
Si Padriega, matod sa Wikipedia, maoy nagtukod sa Bisaya Magasin, ang labing dugay nga mantalaan sa pinulongang Sinugboanon.
Tungod sa pagtukod niya sa maong basahon, si Padriega gianggaan og “Tatay sa Bisaya” sa iyang kakontemporaryo.
Siya nabantog sa iyang lindog nga “Mga Hunahuna sa Magbabalak.” Ang panganay niyang balak kay nag-ulohag “Hikalimtan” apan ang naila nga obra maestra niya mao ang iyang balak nga “Dalagang Pilipinhon.”
Gawas sa El Filibusterismo, gihubad usab sa Sinugboanon ang Noli Me Tangere nga napatik niadtong 1962. Duha ka mga kopya sa maong libro ang mabasa sa CCPL.
Aduna kini 63 ka mga kapitulo ug moabot sa 545 ang mga panid.
Ang duha ka mga libro gihubad sa pinulongang Sinugboanon aron dali masabtan sa mga Bisaya nga mobasa niini.
Ang maong mga libro kay pinatik sa Nasudnong Komisyon sa mga Bayani atol sa administrasyon ni anhing Pres. Diosdado Macapagal agi og pahinungod sa ika-100 ka sumad sa pagkatawo ni Rizal.
Si Cebu City Librarian Rosario Chua nibutyag nga diha na ang maong mga libro sa wa pa siya magtrabaho sa CCPL sugod niadtong 1981.
Ang mga libro, matod niya, hinatag sa National Library of the Philippines (NLP) nga kabahin sa alokasyon sa mga libro nga ilang madawat matag tuig.
Si Chua nipasabot nga pinaagi sa memorandum of agreement duna silay alokasyon sa mga libro gikan sa NLP balor og P500,000 matag tuig sa pagsugod.
“Pero wala naman na siya ma-follow because kay ang mga books gawas nga nimahal, nigamay man ang budget sa national kay nidaghan man ang number of libraries. Naa may mga libraries nga gi-open sa lainlaing lugar, mao usab usahay nga mahatagan nila og priority. Mao nang nisabot sad ta nga dili kaayo mo-rely,” pagpasabot ni Chua dihang nahinabi sa Superbalita Cebu niadtong Martes.
Siya nidugang nga naa gihapon ang tinuig nga book allocation apan di na kaayo daghan nga gibanabanang balor na lang og P100,000.
Si Chua namahayag kaniadto daghan na kaayong mga libro ang P500,000 nga kantidad sa alokasyon kay barato pa sa una ang presyo.
Siya nibutyag usa sa mga kondisyon aron padayon makadawat og alokasyon ang mga public library gikan sa NLP kinahanglan ang city librarian kinahanglan nga moapil sa tinuig nga conference sa mga public librarian sa tibuok nasod nga ipahigayon sa matag Marso sa tuig.
Ang CCPL makadawat og alokasyon matag tuig gikan sa NLP kay kini maoy nagsilbi nga Cebu branch sa nasudnong library.
Ang CCPL unang gibuksan niadtong Abril 13, 1919 isip branch sa Philippine Library and Museum, nga karon nahimo nang NLP.
“Kita ang usa sa mga pinakadugay na nga library sa Pilipinas, mao nang kita sad ang pinakanindot nga library outside Manila...Dili ka kakitag public library nga ingon ani nga design gawas sa Manila kay nindot ang iyang (CCPL) architectural design,” dugang ni Chua.
Ang labing karaan nga libro nga mabasa sa CCPL kay kabahin sa Obstetrics ug Gynecology nga napatik niadtong 1892.
Ubos sa Section 3 sa Republic Act 7743 kun ang balaod alang sa katukoran sa mga library sa mga siyudad ug kalungsoran ug barangay reading centers sa tibuok nasod, katungdanan sa National Library ang paghatag og standard set of reference books ug ubang materyales sama sa apan dili limitado sa encyclopedias, dictionaries, mapa ug globes kon dunay matukod nga mga library.
Ang National Library padayon nga mo-supply sa public libraries og mga libro, non-book materials, equipment supplies ug uban pa.