PATAY ang usa ka corporal human gipusil sa iyang kauban nga sundalo human kini gibadlong tungod kay hubog nga miuli sa ilang kampo.
Ang insidente nahitabo alas 9 sa buntag niadtong Sabado didto sa 67th Infantry Battalion, Patrol base sa Crossing Malibago, Barangay Malibago, Cateel, Davao Oriental.
Subay sa journal sa Police Regional Office (PRO)-Davao giila ang biktima nga si Corporal Dominador Galvano, squad leader sa 67th IB, samtang ang suspek mao si Private First Class (PFC) Mijohn Andol Silva.
Nasayran nga nananghid ang suspek ngadto sa biktima nga molakaw sila sa patrol base kay mangaligo sa Aliwagwag Falls uban sila Private Valler ug PFC Alteveros.
Apan sa ilang pagbalik sa patrol base giingong giistoryahan ang suspek sa biktima nganong late kini ug hubog nga mibalik sa ilang patrol base.
Atol sa insidente, giingong nasuko ang suspek sa gisulti sa iyang squad leader nga maoy hinungdan nga mikuha kini'g M4 rifle dayon girapido ang biktima tumong sa ulo nga miresulta sa kamatayon.
Narekober sa crime scene ang usa ka M4 rifle, kinse ka mga buhing bala, usa ka long magazine ug walo ka mga basiyo sa bala nga maoy gipabuto sa suspek.
Sa kasamtangan, gibalhog na ang suspek sa Cateel Municipal Police Station samtang giandam na ang pagpasaka og kaso kaniya didto sa korte.